Read O‘zbek tilidagi Muqaddas Kitob, 2013 Ayub 33 Bible Online

Ayub 33 - O‘zbek tilidagi Muqaddas Kitob, 2013 bible

Ayub 33

¹Ey Ayub, endi mening so‘zlarimni eshiting, Hamma gaplarimga quloq soling.

²Men hozir gapirishga tayyorman. So‘zlarim tilimda tizilib turibdi.

³So‘zlarim pok ko‘nglimdan chiqadi, Chin dildan gapiraman.

⁴Meni Xudoning Ruhi yaratgan, Qodir Xudoning nafasi menga hayot berib turibdi.

⁵Agar qo‘lingizdan kelsa, menga javob bering–chi, O‘zingizni himoya qilib ko‘ring–chi!

⁶Xudoning oldida siz ham, men ham birmiz, Men ham tuproqdan yaralganman.

⁷Mendan qo‘rqmasangiz ham bo‘ladi, Sizga hech zulm o‘tkazmayman.

⁸Gaplaringizni o‘z qulog‘im bilan eshitdim, Quyidagi so‘zlarni oldimda aytgansiz:

⁹“Men pokman, aybsizman, Top–tozaman, menda hech bir ayb yo‘q.

¹⁰Xudo esa menga qarshi chiqishga bahona qidiryapti, Meni O‘z dushmanlari qatoriga qo‘shib qo‘ydi.

¹¹Oyoqlarimni zanjirband qildi, Yurgan yo‘limni kuzatib turadi.”

¹²Ayub, mana shu borada siz nohaqsiz. Men sizga shuni aytay: Xudo butun odamzoddan ulug‘roqdir.

¹³Shunday ekan, nimaga U bilan da’volashyapsiz? Nima uchun, Xudo menga javob bermaydi, deysiz?

¹⁴Xudo qayta–qayta gapiradi. Shunda ham odamlar tushunmaydi.

¹⁵Odamlar chuqur uyquga ketganda, O‘rinlarida uxlab yotganda, Tushlar, tungi vahiylar orqali

¹⁶Xudo ularning quloqlariga gapiradi, O‘z ogohlantirishlari bilan ularni qo‘rqitadi.

¹⁷Inson gunohlaridan qaytsin, Odamzod takabbur bo‘lmasin, deb bu so‘zlarni aytadi.

¹⁸O‘sha ogohlantirishlar odamlarni qabrdan saqlaydi, O‘lim daryosidan qutqaradi.

¹⁹Xudo insonlarga dardu og‘riq berib, Odamlarning suyaklarini zirqiratib, tarbiyalaydi.

²⁰Shunda ular nonga ham qaray olmaydigan bo‘lib qoladi. Hatto eng shirin ovqatlar ham ko‘nglini aynitadi.

²¹Ular ozib–to‘zib ketadi, faqat terisi qoladi. Oldin ko‘rinmagan suyaklari endi turtib chiqadi.

²²Ana, ular qabrga yaqinlashib qoldi. O‘lim ularning jonini poylab turibdi.

²³Lekin shu paytda insonning himoyachisi bo‘lsa, Minglarga qarshi chiqib, O‘sha insonni solih, deb tasdiqlaydigan bir himoyachisi

²⁴O‘sha insonga rahm qilib: “Ey Xudoyim, uni qabrdan qutqargin, Bu insonning joni evaziga to‘lov topdim”, desa,

²⁵O‘sha insonning tanasi yosh bolaniki kabi yangilanadi, Yoshligidagi kabi yana kuchga to‘ladi.

²⁶O‘sha inson Xudoga ibodat qiladi, Xudo esa uni qabul qiladi. Xudoning huzuriga u shodlik bilan kiradi, Chunki Xudo uni solihlik yo‘liga qaytaradi.

²⁷O‘sha inson kelib, boshqalarga shunday deydi: “Mana, men to‘g‘ri yo‘ldan yurmasdan, Gunoh qilgan edim, Lekin men o‘zimga loyiq jazoni olmadim.

²⁸Xudo jonimni qabrdan qutqarib qoldi. Endi mening hayotim yorug‘ kunlarga to‘la!”

²⁹Ha, Xudo odamzodga shunday qiladi, Bir emas, ikki emas, ko‘p marta takrorlaydi.

³⁰Insonlarni qabrdan saqlash uchun, Hayot nuri ularning yo‘llarini yoritsin, deb shunday qiladi.

³¹Ey Ayub, diqqat qiling, menga quloq soling, Jim turing, men gapiray.

³²Agar biror gapingiz bo‘lsa, menga javob bering. Gapiravering, chunki oqlanishingizni xohlayman.

³³Lekin gapingiz bo‘lmasa, menga quloq soling, Sukut saqlang, men sizga donolikni o‘rgatay.