Read O‘zbek tilidagi Muqaddas Kitob, 2013 Ayub 34 Bible Online

Ayub 34 - O‘zbek tilidagi Muqaddas Kitob, 2013 bible

Ayub 34

¹Elixu gapida davom etib shunday dedi:

²“Mening so‘zlarimni tinglang, ey donishmandlar. Menga quloq soling, ey bilimdonlar.

³Til taomning ta’mini tatiganday, Quloq ham so‘zlarni sinab ko‘radi.

⁴Kelinglar, nima to‘g‘riligini tanlaylik, Nima yaxshiligini birgalikda o‘rganaylik.

⁵Ayub shunday deydi: “Men aybsizman, lekin Xudo menga adolat qilmayapti.

⁶To‘g‘ri bo‘lsam ham, meni yolg‘onchiga chiqarishdi. Gunohsiz bo‘lsam ham tuzalmas dardga yo‘liqqanman.”

⁷Ayubga o‘xshagan odam bormi? Ayub uchun Xudoga shak keltirish suv ichishday bir gap!

⁸Uning o‘rtoqlari badkirdorlardir, U fosiqlar bilan vaqt o‘tkazadi.

⁹Ayub hatto shunday degan: “Xudoga yoqadigan ish qilishdan hech bir foyda yo‘q!”

¹⁰Shuning uchun menga quloq soling, zakovatlilar. Xudo aslo fosiqlik qilmas, Qodir Xudo nohaqlik qilmas.

¹¹Axir, U odamlarning qilganlariga yarasha qaytaradi, Qilmishlarining oqibatini o‘z boshlariga keltiradi.

¹²Mana bu haqiqatdir: Xudo fosiqlik qilmaydi, Qodir Xudo adolatga xiyonat etmaydi.

¹³Xudoga yer yuzidagi hukmronlikni birov beribdimi?! Biror kimsa Xudoni dunyoga hukmdor qilib qo‘yibdimi?!

¹⁴Agar Xudo O‘z Ruhini — Nafasini qaytarib olishga qaror qilsa,

¹⁵Butun insoniyat birdaniga halok bo‘lgan bo‘lardi, Odamzod yana tuproqqa qaytgan bo‘lardi.

¹⁶Aqlingiz bo‘lsa eshiting, Gaplarimga quloq soling.

¹⁷Adolatdan nafratlangan inson hukmdor bo‘la olarmidi? Qudratli va Odil Xudoni hukm qilmoqchimisiz?

¹⁸Shohlarga: “Sizlar yaramassiz”, — deydigan, Beklarni fosiq, deb ataydigan Xudo–ku!

¹⁹U beklar uchun tarafkashlik qilmaydi, Boyni kambag‘aldan ustun ko‘rmaydi. Axir, ularning hammasini O‘zi yaratgan!

²⁰Odamlar bir zumda o‘ladi. Yarim kechada qaltiraydi–yu, jon beradi. Qudratlilar osonlikcha yo‘q qilinadi.

²¹Odamlar qilgan ishlarni Xudo kuzatib turadi, Ular bosgan har bir qadamni Xudo ko‘rib turadi.

²²Biron zulmat yoki qorong‘i joy yo‘qki, Badkirdorlar o‘sha joyda yashirinib olsa.

²³Insonni hukm qilish uchun Xudo taftish o‘tkazishi shart emas.

²⁴Xudo tekshirmasdan ham qudratlilarni qulatib, Ularning o‘rniga boshqalarni joylaydi.

²⁵Xudo qudratlilarning ishlarini kuzatib turadi. Shuning uchun kechasi ularni ag‘darib tashlaydi, Ular halok bo‘ladi.

²⁶Xudo ularni fosiqligi uchun Hammaning ko‘z oldida jazolaydi.

²⁷Chunki ular Xudoga ergashishni rad qildilar, Xudoning yo‘llarini anglab yetmadilar.

²⁸Kambag‘allarni shunday ezdilarki, Ularning nolasi Xudoga yetib bordi.

²⁹Xudo sukut saqlasa, kim ham uni hukm qilardi? U yuzini yashirsa, kim ko‘ra olardi? Bu biror inson yoki biror xalqning qo‘lidan kelarmikan?!

³⁰Betavfiqlar boshqa odamlarga tuzoq bo‘lmasin, deb Xudo ularni hukmdor qilib qo‘ymaydi.

³¹Birortasi Xudoga: “Men jazoimni oldim, endi gunoh qilmayman.

³²Men ko‘rolmaydigan narsalarni o‘rgat, Ha, noto‘g‘ri ishlar qildim, Endi bunday qilmayman”, — deydimi?

³³Xudo sizning o‘lchovingiz bo‘yicha qaytarishi kerakmi? Axir, siz Undan nafratlandingiz–ku! Ey Ayub, men emas, siz qaror qilishingiz kerak. Qani, bilganingizni ayting–chi.

³⁴Mana, gaplarimni eshitgan donolar, Aql–idroklilar shunday deyapti:

³⁵“Ayub bilmasdan gapiryapti, Gaplarining ma’nisi yo‘q.”

³⁶Qani endi, Ayub yaxshilab hukm qilinsa, Axir, u fosiqlarga o‘xshab gapiryapti–ku.

³⁷Ayub Xudoga qarshi chiqib, Gunohi ustiga gunoh qo‘shyapti. Oramizda Xudoni mazax qilyapti, Xudoga qarshi ko‘p gap aytyapti.”