Read O‘zbek tilidagi Muqaddas Kitob, 2013 Ayub 35 Bible Online

Ayub 35 - O‘zbek tilidagi Muqaddas Kitob, 2013 bible

Ayub 35

¹Elixu gapini davom ettirib, shunday dedi:

²Ey Ayub: “Xudoning oldida aybsizman”, — deb aytishingiz noto‘g‘ri.

³Siz Xudoga: “Gunohsizligim Menga yaxshilik keltirishi kerak edi–ku! Ammo men yomonlik ko‘rdim!” — deb aytishingiz ham to‘g‘ri emas.

⁴Siz va do‘stlaringiz gapimni eshitinglar.

⁵Osmonga qarab ko‘ringlar, Sizlardan ancha tepada bo‘lgan bulutlarga qaranglar.

⁶Itoatsizlik qilsangiz, Xudoga nima zarar? Gunohlaringiz ko‘paysa, Xudoga nima?

⁷Bordi–yu, solih bo‘lsangiz, Unga nima qilib berardingiz? U sizning qo‘lingizdan biror narsa olishga zormi?

⁸Fosiqligingizdan faqat insonlar qiynaladi. Solihligingiz ham faqatgina insonlarga madad beradi.

⁹Zulm haddan ko‘pligidan odamlar faryod qiladi. Zo‘ravonlarning qo‘lidan qutqaringlar, deb yordam so‘raydi.

¹⁰Ammo hech kim yaratgan Xudoga yolvormaydi. Tunlari umid beradigan Xudoga iltijo qilmaydi.

¹¹U esa yer yuzidagi jonivorlarga qaraganda bizga ko‘proq bilim bergan–ku! Bizni osmondagi qushlardan aqlliroq qilgan–ku!

¹²Zulm ostida qolgan insonlar faryod qilishsa ham, Xudo javob bermaydi. Axir, ularning o‘zlari takkabur va fosiqdir.

¹³Xudo bunday insonlarning puch so‘zlariga umuman quloq solmaydi, Qodir Xudo ularga e’tibor bermaydi.

¹⁴Ey, Ayub! Siz: “Xudoni ko‘rmayapman”, deysiz. Da’voingizni Unga keltirdingiz, endi sabr qiling!

¹⁵Siz: “Xudo g‘azabini sochmayapti, Fosiqlikka zarracha e’tibor bermayapti”, deb o‘ylaysiz.

¹⁶Shunday qilib, Ayub bema’ni gaplarni gapiryapti. Hech nima bilmay turib, gapni ko‘paytiryapti.”