Read O‘zbek tilidagi Muqaddas Kitob, 2013 Ayub 36 Bible Online

Ayub 36 - O‘zbek tilidagi Muqaddas Kitob, 2013 bible

Ayub 36

¹Elixu gapida davom etib shunday dedi:

²“Yana bir oz sabr qiling, men sizlarga ko‘rsatay, Xudo tomonida turib gapiradigan gaplarim bor hali.

³Mening bilimim juda ko‘p, Meni Yaratganning odil ekanligini sizlarga ko‘rsataman.

⁴Rostini aytaman, so‘zlarim yolg‘on emas. Mana men, bilimi barkamol inson sizning oldingizdaman.

⁵Xudo qudratlidir, Ammo U insonlardan nafratlanmaydi, Xudo qudratli va barqarordir.

⁶Fosiqlarning yashashiga Xudo yo‘l qo‘ymaydi, Ezilganlarga esa adolat qiladi.

⁷Solihlardan yuz o‘girmaydi, Solihlarni shohlar bilan birga taxtga chiqaradi, Ularni to abad yuksaltiradi.

⁸Agar insonlar zanjirband bo‘lsa, Azob ularni iskanjaga olgan bo‘lsa,

⁹Xudo ularning qilmishlariniyu gunohlarini o‘zlariga ko‘rsatadi, Ular mag‘rurlanib ketganlarini oshkor qiladi.

¹⁰Yo‘l–yo‘riqlarini tinglashga majbur qiladi, Yovuzlikdan qaytishga amr qiladi.

¹¹Agar ular itoat etib, Xudoga xizmat qilsalar, Qolgan umrlarini farovonlikda o‘tkazadilar, Hayotlari rohatda o‘tadi.

¹²Ammo itoat etmasalar, Ular o‘lim daryosiga g‘arq bo‘ladilar, Aql–idrokka erishmay, olamdan o‘tadilar.

¹³Xudosizlar alamini ichiga yutib yuraveradilar, Xudo ularni kishanlasa ham yordam so‘ramaydilar.

¹⁴Ular sajdagohlardagi fahshbozlar orasida, Yoshliklaridayoq vafot etadilar.

¹⁵Xudo qiynalganlarni o‘sha azoblari orqali qutqaradi, Zulm va jabr–jafoga mubtalo qilib, ularning ko‘zlarini ochadi.

¹⁶Xudo sizni ham darddan ozod qilib, Cheklanmagan kenglikka olib chiqadi, Dasturxoningiz noz–ne’matlar bilan to‘ladi.

¹⁷Ammo siz hozir fosiqlarni hukm qilish bilan ovorasiz. Xayolingiz adolat va hukm bilan band.

¹⁸Ehtiyot bo‘ling, yana birov sizni boylik bilan vasvasaga solmasin, Katta poralar sizni yo‘ldan urmasin.

¹⁹Boyliklaringiz sizni kulfatdan qutqara olarmidi?! Qudratu–kuchingiz endi sizga yordam bera olarmidi?!

²⁰Tunni kutavermang, Axir, xalqlar kechasi yo‘q bo‘lib ketadilar–ku!

²¹Hushyor bo‘ling! Fosiqlikka yuz burmang, Axir, dard sizni fosiqlikdan saqlash uchun yuborilgan–ku.

²²Xudo O‘z qudrati tufayli yuksakdir! Unga o‘xshash ustoz bormi?

²³Kim Xudoga yo‘l ko‘rsata olardi?! Kim Unga: “Qilganlaring noto‘g‘ri”, deya oladi?!

²⁴Xudo qilgan ishlari uchun Insonlar Uni madh qiladilar, Siz ham doimo ularga jo‘r bo‘ling.

²⁵Butun inson zoti Uning ishlarini ko‘rgan, Hamma uzoqdan turib kuzatadi.

²⁶Xudo qanchalar buyuk! Uning buyukligiga aqlimiz yetmaydi, Xudoning umrini hisoblaydigan sonning o‘zi yo‘q.

²⁷U suv tomchilarini yig‘ib, Ularni yomg‘irga aylantiradi.

²⁸Bulutlardan yomg‘ir yog‘diradi, Odamzod bundan bahramand bo‘ladi.

²⁹Xudo qanday qilib bulutlarni yurg‘izishini Yoki O‘z maskanidan turib, momaqaldiroqni qanday gumburlatishini Kim ham tushuna oladi?

³⁰Mana, qaranglar, Xudo shunday chaqmoq chaqtiradiki, Hatto dengiz tubi ham yorishib ketadi.

³¹Xudo O‘z qudratli ishlari bilan xalqlarni boshqaradi, Ularga farovonlik ato qiladi.

³²Chaqmoqni qo‘liga olib, Belgilagan joyiga borib urishni amr qiladi.

³³Bo‘ron kelayotganini momaqaldiroq bildirib turadi, Hatto chorva ham oldindan sezadi.