Read O‘zbek tilidagi Muqaddas Kitob, 2013 Ayub 37 Bible Online

Ayub 37 - O‘zbek tilidagi Muqaddas Kitob, 2013 bible

Ayub 37

¹Mana shular haqida o‘ylasam, Yuragim o‘ynab, joyida sakraganday bo‘ladi.

²Xudo ovozining gumburlashiga yaxshilab quloq soling. Uning og‘zidan chiqayotgan guldirosni eshiting.

³Chaqmog‘i butun falak ostida chaqnab, Yerning to‘rt burchiga yetib boradi.

⁴Undan keyin gulduros eshitiladi, Xudo O‘zining ulug‘vor ovozi bilan gumburlagan sado chiqaradi, Uning ovozi eshitilganda chaqmoq chaqnayveradi.

⁵O‘z ovozi bilan Xudo ajoyib gulduros hosil qiladi, Uning qilgan ishlariga aqlimiz yetmaydi.

⁶U buyursa yerga qor yog‘adi, Xudo aytgani uchun sel yog‘adi.

⁷U hamma odamlarning ishlarini to‘xtatib qo‘yadi, Shunda insonlar Xudoning qudratini bilib oladi.

⁸Jonivorlar o‘z inlariga kiradi, O‘z uyalarida yashirinadi.

⁹Bo‘ron o‘z makonidan chiqadi, Sovuq shamol esadi.

¹⁰Xudo nafasi bilan muz hosil qiladi, Bepoyon suvlar muzlab qoladi.

¹¹Bulutlarni suv bilan to‘ldiradi–da, Ularning orasidan chaqmoq chaqtiradi.

¹²Xudo bulutlarga yo‘l ko‘rsatadi, Xudoning amrlari bajo bo‘lishi uchun Shamolu suv yer yuzi bo‘ylab aylanadi.

¹³U ba’zan, odamzodni jazolay, deb yomg‘ir yog‘diradi. Ba’zan esa yerni sug‘oray, Odamzodga O‘z sevgimni ko‘rsatay, deb bulutlarni yuboradi.

¹⁴Bir daqiqa jim turing, Ayub, quloq soling, Xudoning ajoyib ishlari haqida o‘ylab ko‘ring.

¹⁵Xudo qanday qilib bulutlarni boshqarishini Yoki chaqmoq chaqtirishini bilasizmi?

¹⁶Qanday qilib bulutlar osmonda osilib turishini, Bilimi barkamol Xudoning ajoyibotlarini bilasizmi?

¹⁷Axir, yer yuzida esgan garmsel tufayli Kiyimlaringiz ham isib ketadi–ku!

¹⁸Osmon sayqallangan bronzaday qattiq, Xudo uni yoyib qo‘ygan! Shunday qilish sizning ham qo‘lingizdan keladimi?

¹⁹Xudoga qanday gapirishni bizga o‘rgating. Biz notavonlar da’voimizni tushuntira olmaymiz.

²⁰Gapirmoqchi bo‘lganimni birortasi Xudoga aytishi kerakmi? Axir, inson gapirsa, albatta halok bo‘ladi–ku!

²¹Shamol bulutlarni haydagandan so‘ng Tiniq osmonda charaqlab turgan quyoshga Hech kim qaray olmaydi.

²²Shimoldan yorqin nurlar taralmoqda, Xudo ajoyib ulug‘vorlikka burkangan.

²³Biz Qodir Xudoga yetolmaymiz, Uning qudrati yuksakdir. U to‘g‘ri hukm chiqaradi, adolatiga xiyonat qilmaydi.

²⁴Shuning uchun insonlar Undan qo‘rqadi. Ha, qalbi donolar Xudoni ko‘radi.