Read O‘zbek tilidagi Muqaddas Kitob, 2013 Ayub 38 Bible Online

Ayub 38 - O‘zbek tilidagi Muqaddas Kitob, 2013 bible

Ayub 38

¹Shundan keyin Egamiz quyun orasidan Ayubga shunday deb aytdi:

²Bilmay turib gapirayotgan kim? Kim donoligimga gumon qilyapti?

³Qani, erkakka o‘xshab belingni bog‘la, Seni so‘roq qilaman, javob ber–chi.

⁴Zaminning poydevorini qo‘yganimda qayerda eding? Dono ekansan, qani ayt–chi!

⁵Yer yuzining chetlarini belgilagan kim? Axir, o‘zing bilasan–ku! Kim yerning ustidan chiziq o‘tkazdi?

⁶[6-7] Yerning poydevorini nima ushlab turibdi? Tong yulduzlari jo‘r bo‘lib, qo‘shiq kuylaganda, Samoviy mavjudotlar quvonchdan hayqirganda Yerning tamal toshini qo‘ygan kim?

⁸Dengiz yer tubidan otilib chiqqanda, Darvozalarni yopib, to‘sib qo‘ygan kim?

⁹Axir, Men bulutlarni dengizga kiyim qilib qo‘ydim. Dengizni qalin zulmat bilan o‘rab qo‘ygan Menman.

¹⁰Men dengizga chegaralar belgiladim, Dengizni tambalangan darvozalar bilan to‘sib qo‘ydim.

¹¹Men dengizga: “Faqat mana shu yergacha kelasan, Sening mag‘rur to‘lqinlaring shu yerda to‘xtaydi”, deb aytdim.

¹²Sen umringda biror marta tong otsin, deb buyurganmisan? Yoki sharqdan kun chiqsin, deb aytganmisan?

¹³Quyosh nuriga: “Yerning to‘rt burchiga tarqalib, Fosiqlarni yashiringan joyidan siltab chiqargin”, deb aytganmisan?

¹⁴Kun yorishar ekan, matodagi bezaklar kabi, Muhr bosilgan mum kabi, Yer yuzidagi qirlaru vodiylar o‘z shaklini ko‘rsatadi.

¹⁵Fosiqlarga nur berilmaydi, Ularning yomon niyatda ko‘tarilgan qo‘li sinadi.

¹⁶Dengiz tubidagi buloqlarni borib ko‘rganmisan? Suvlar tubida yurib, tekshirib ko‘rganmisan?

¹⁷O‘lim darvozalari qayerdaligini bilasanmi? Zulmat darvozalarini senga ko‘rsatishganmi?

¹⁸Bu dunyoning qanchalik ulkanligini bilasanmi? Agar shularning hammasini bilsang, Menga ayt–chi!

¹⁹Yorug‘likning maskaniga olib boradigan yo‘lni, Zulmatning turar joyini bilasanmi?

²⁰Ularni o‘z joylariga olib bora olasanmi? O‘sha joyga qanday borishni bilasanmi?

²¹Ha, sen bilasan albatta! Sen yorug‘lik va zulmatdan oldin tug‘ilgansan–da! Qanchalik uzoq umr ko‘ryapsan–a!

²²Qor saqlanadigan omborxonalarni ko‘rganmisan? Do‘l saqlanadigan omborlarni–chi?

²³Men ularni kulfat kunlari uchun, Urush va jang kunlari uchun saqlab qo‘yganman.

²⁴Yorug‘lik manbaiga olib boradigan yo‘l qani? Sharq shamoli chiqadigan joy qayerda?

²⁵Selu jalaga kim yo‘l ochib bergan? Chaqmoqning yo‘llarini kim belgilagan?

²⁶Huvullab yotgan biyobonga, Kimsasiz cho‘lga kim yomg‘ir yog‘diradi?

²⁷Tashlandiq xarobazorlarni suvga qondirib, U yerlarda maysalar o‘stiradigan kim?

²⁸Yomg‘irning otasi bormi? Shabnamni kim dunyoga keltirgan?

²⁹Muz qayerdan tug‘iladi? Samodan tushadigan qirovga kim hayot bergan?

³⁰Suv toshlarday qotib qoladi, Dengiz sathi muzlaydi.

³¹Hulkar yulduzini ushlab turgan arqonlarni yechib tashlay olasanmi? Parvin yulduzlarini sen bog‘lab qo‘ya olasanmi?

³²Yulduz turkumlarini o‘z mavsumida joyiga boshlaysanmi? Katta ayiq va kichik ayiq burjidagi yulduzlarga yo‘l ko‘rsata olasanmi?

³³Osmon qonunlarini bilasanmi? Sen o‘sha qonunlarni yer yuziga tatbiq qila olasanmi?

³⁴Bulutlarga qarab baqirib ko‘rgin–chi, Qani ustingga yomg‘ir yog‘armikan?

³⁵Sen chaqmoqni chaqtira olasanmi? U kelib, xizmatingizdaman, deydimi?

³⁶Kim yuraklarga donolik bergan? Kallaga aql–idrokni kim solib qo‘ygan?

³⁷[37-38] Qani, bulutlarni sanashga kimning aqli yetadi? Quruq tuproqni loyga aylantirib, Kesaklarni bir–biriga yopishtirish uchun Kim falak meshlarini ag‘darib, yomg‘ir yog‘dira oladi?

³⁹[39-40] G‘orlarida yashirin yotgan, Inlarida kutib yotgan Sherning bolalarini to‘ydira olasanmi, Ona sherga o‘lja topib bera olasanmi?

⁴¹Qarg‘aning bolalari qorni ochib, daydib yurganda, Menga faryod qilganda ehtiyojlarini qondirgan kim, axir?