Read O‘zbek tilidagi Muqaddas Kitob, 2013 Ayub 39 Bible Online

Ayub 39 - O‘zbek tilidagi Muqaddas Kitob, 2013 bible

Ayub 39

¹Tog‘ echkilari qachon tug‘ishini bilasanmi? Kiyiklar bolalaganini ko‘rganmisan?

²Ular bolasini necha oy qornida ko‘tarib yurishini bilasanmi? Ular bolalaydigan vaqtni–chi?

³Ular cho‘kkalab tug‘adi, Bolalarini dunyoga keltiradi.

⁴Ularning bolalari ochiq joylarda o‘sib, kuchga to‘ladi, Ota–onasini tashlab ketadi, boshqa qaytib kelmaydi.

⁵Qulonga kim ozodlik bergan? Kim uning arqonini yechib tashlagan?

⁶Men dashtlarni unga makon qilib berdim, Sho‘r yerlar qulonning maskani bo‘ldi.

⁷Shahardagi shovqin–surondan u kuladi, Hech kim uning ustiga minib, unga baqirolmaydi.

⁸Qirlar qulonning yaylovidir, O‘sha yerlarda u ko‘katlarni qidirib yuradi.

⁹Yovvoyi buqa senga xizmat qilishga rozi bo‘ladimi? Tunni sening og‘ilingda o‘tkazadimi?

¹⁰Arqon bilan uni omochga bog‘lay olasanmi? U yerlaringni ag‘darib beradimi?

¹¹Kuchi ko‘p, deb unga ishona olasanmi? Hamma og‘ir ishlaringni unga topshirasanmi?

¹²U hosilingni yig‘ib, Xirmonga olib kelishiga ishonasanmi?

¹³Tuyaqush qanotlarini sevinch bilan qoqaveradi, Ammo uning qanotu patlari laylaknikiga teng kelolmaydi.

¹⁴Tuyaqush tuxumlarini yerga qo‘yadi, Ularni qumda isitadi.

¹⁵Birov oyoqlari bilan tuxumlarini bosib ketishidan, Yovvoyi hayvon ularni ezib tashlashidan xavotirlanmaydi.

¹⁶O‘z bolalariga begonalarga o‘xshab berahm. Chekkan zahmati behuda, ammo unga baribir.

¹⁷Chunki Xudo unga aql bermagan, Uni idrokdan qisib qo‘ygan.

¹⁸Ammo tuyaqush qanotlarini yoyib yugurganda, Otu chavandozni changida qoldirib ketadi.

¹⁹Otga kuchni sen berganmisan? Uning bo‘ynini sen yol bilan qoplaganmisan?

²⁰Sen otlarni chigirtkaday sakratasanmi?! Otlar baland ovoz bilan kishnab, Odamlarni qo‘rquvga soladi.

²¹Shiddat bilan yerni tepadi, Qattiq kuch bilan yugurib, jangga otiladi.

²²Qo‘rquvni bilmaydi, vahimaga tushmaydi, Qilichdan ham qochmaydi.

²³Ularning ustida o‘qdon taraqlaydi, Atrofida qilichu nayzalar yaltiraydi.

²⁴Burg‘ular chalinganda otlar bir joyda turolmaydi, Ular chopqillab, yerni changitadi.

²⁵Har burg‘u chalinganda kishnaydi, Uzoqdanoq jang hidini sezadi. Sardorlarning jangga da’vatlariyu baqiriqlarini eshitadi.

²⁶Qarchig‘aylar qanotlarini yoyib, janubga uchadi. Ularga uchishni sen o‘rgatdingmi?

²⁷Sen buyurganing uchun burgut parvoz qiladimi? Sening so‘zing bilan baland joylarda in quradimi?

²⁸U qoyalarda yashaydi, Qirrali qoyalar uning qal’asi.

²⁹O‘sha yerdan turib, burgut o‘ljasini topadi, Uzoqdan turib ko‘zlari ko‘radi.

³⁰Uning bolalari qonga to‘yadi, Jasadlar qayerda bo‘lsa, ular ham o‘sha yerda.”

³¹Keyin Egamiz Ayubga shunday dedi:

³²“Qodir Xudo bilan bahslashayotgan odam endi Uni to‘g‘rilaydimi?! Qani, Xudoni ayblagan gapirsin endi!”

³³Shunda Ayub Egamizga javob berdi:

³⁴“Men senga javob berishga loyiq emasman, Og‘zimni qo‘lim bilan yopaman.

³⁵Bir–ikki gapirib javob topmadim, Endi boshqa gapirmayman.”