Read O‘zbek tilidagi Muqaddas Kitob, 2013 Ayub 4 Bible Online

Ayub 4 - O‘zbek tilidagi Muqaddas Kitob, 2013 bible

Ayub 4

¹Shundan keyin temonlik Elifaz Ayubga shunday dedi:

²“Bir gap aytsam, xafa bo‘lmaysanmi? Axir, kim gapirmay jim tura oladi?!

³Sen ko‘plarga nasihat qilar eding. Ojizlarga yordam berar eding.

⁴Qoqilganlarga so‘zlaring bilan dalda berarding, Og‘ir yuk ostida ezilganlarga kuch bag‘ishlarding.

⁵Endi esa azob–uqubatga uchraganingda tushkunlikka tushyapsan, O‘z boshingga tushganlardan sarosimada o‘tiribsan.

⁶Xudodan qo‘rqishing umiding bo‘lishi kerak emasmi?! Yo‘llaring to‘g‘riligi senga umid bag‘ishlamaydimi?!

⁷O‘ylab ko‘rgin–chi, qachon aybsiz inson halok bo‘lgan?! Biror yerda solih kishi hech yo‘q qilinganmi?!

⁸O‘z hayotimda ko‘rganman, kim yovuzlik, G‘am–g‘ussa eksa, xuddi o‘shani o‘radi.

⁹Xudoning nafasi ularni o‘ldiradi, Xudoning g‘azabidan fosiqlar daf bo‘ladi.

¹⁰Ularning shernikiday bo‘lgan ovozlarini Xudo o‘chiradi, O‘sha maxluqlarning tishlarini Xudo sindiradi.

¹¹O‘lja yo‘qligidan u sherlar halok bo‘ladi, Shervachchalari ham uzoqlarga tarqalib ketadi.”

¹²“Menga bir so‘z yashirincha keldi, Qulog‘imga shivirlab eshitildi.

¹³Insonlar chuqur uyquda bo‘lganda, Tashvishli tushlarda bu so‘z keldi.

¹⁴Meni qo‘rquv–qaltiroq bosdi, Butun vujudim larzaga keldi.

¹⁵Bir ruh yuzimni silab o‘tdi, Shunda tuklarim tikka bo‘lib ketdi.

¹⁶Ruh to‘xtab, qimirlamay turdi, Ammo uni aniq ko‘rmadim. Ko‘z oldimda bir sharpa turar edi. Sukunat cho‘kdi, keyin bir ovoz eshitdim:

¹⁷“Insonlar Xudoning oldida solih bo‘la oladimi?! Odamlar Yaratuvchisining oldida pok bo‘la oladimi?!

¹⁸Axir, Xudo hatto O‘z farishtalariga ishonmaydi–ku, Ulardan ham ayb topadi–ku!

¹⁹Shunday ekan, tuproqdan yaratilgan insonlardan, Loydan bino bo‘lgan, kuyaday eziladigan Odamlardan qanchalar ayb topadi?!

²⁰Axir, ular ertalab bor, Kechasi esa yo‘q bo‘lib ketadigan insonlar–ku! Ularning nomi abadiy o‘chib ketadi.

²¹Chodirlarining arqonlari uzib tashlanadi, Ular donolikka yetishmay halok bo‘ladilar.”