Read O‘zbek tilidagi Muqaddas Kitob, 2013 Ayub 40 Bible Online

Ayub 40 - O‘zbek tilidagi Muqaddas Kitob, 2013 bible

Ayub 40

¹Shundan keyin Egamiz quyun orasidan gapirib, Ayubga shunday dedi:

²Qani, erkakka o‘xshab belingni bog‘la, Seni so‘roq qilaman, javob ber–chi.

³Sen Meni adolatsizlikda ayblamoqchimisan? Meni hukm qilib, o‘zingni oqlamoqchimisan?

⁴Sening qo‘ling Xudoning qo‘liday qudratlimi? Uning ovoziga o‘xshab gumburlaydigan ovozing bormi?

⁵Shunday bo‘lsa, qani, o‘zingni shonli dabdabaga o‘ragin–chi, Ulug‘vorlik va salobat bilan burkangin–chi.

⁶G‘azabingni to‘kib soch, Hamma takabbur insonlarga nazar solgin–da, Ularning popugini pasaytirib qo‘y.

⁷Ha, barcha mag‘rur insonlarga qaragin–da, Ularni yer bilan bitta qil. Fosiqlarni turgan joyida ezib tashla.

⁸Hammasini tuproqqa ko‘mib tashla, Ha, yuziga tuproq tortib, qabrni yop.

⁹Shunda Men senga tan beraman, O‘z kuching bilan najot topa olarkansan, deyman.

¹⁰Begemotga qaragin, Xuddi seni yaratganimday uni ham Men yaratganman, U ho‘kizga o‘xshab o‘t yeydi.

¹¹Uning belida kuchi ko‘p, Qorin mushaklari kuchga to‘la.

¹²Dumi sadr daraxtiday kuchli, Son mushaklari juda ham baquvvat.

¹³Uning suyaklari bronzadan yasalgan novlarday, Qo‘l–oyoqlari temirday mustahkam.

¹⁴Men yaratgan jonivorlar orasida u eng ajoyibidir, Yaratganning O‘zigina unga bas kela oladi.

¹⁵Yovvoyi hayvonlar o‘ynab yuradigan qirlar Unga oziq beradi.

¹⁶U xalqoblardagi qamishlar orasida, Nilufar gullari tagida yotadi.

¹⁷U nilufar gullarining soyasida yotadi, Irmoq bo‘yidagi tollar uni o‘rab oladi.

¹⁸Daryo jo‘shib oqsa ham u qo‘rqmaydi, Iordan daryosining to‘lqinlari yuziga urilsa ham U bexavotir turaveradi.

¹⁹Birov uning ko‘zlarini ko‘r qilib, ushlay oladimi?! Ilmoq bilan burnini teshib tuta oladimi?!

²⁰Maxluq Levitanni baliq singari, Ilmoq bilan ushlay olasanmi?! Tilini arqon bilan bog‘lay olasanmi?!

²¹Burnidan arqon o‘tkazib, Jag‘ini ilmoq bilan tesha olasanmi?!

²²O‘sha maxluq qayta–qayta sendan rahm–shafqat tilaydimi?! Xo‘sh, u senga mayin so‘zlar bilan gapiradimi?!

²³Sen bilan ahd tuzib, Bir umrga quling bo‘lib qoladimi?

²⁴Qush bilan o‘ynaganday u bilan o‘ynay olasanmi? Yoki qizlaring uchun uni bog‘lab bera olasanmi?

²⁵Baliqchilar uning uchun savdolashadimi?! Savdogarlarga uni bo‘lib beradimi?!

²⁶Uning terisini nayza bilan tesha olasanmi? Boshini baliqchilarning sanchqisi bilan yora olasanmi?

²⁷Agar unga qo‘l tekkizsang, Bir umrga pushaymon bo‘lasan! Ikkinchi qo‘l tekkizmaydigan bo‘lasan.