Read O‘zbek tilidagi Muqaddas Kitob, 2013 Ayub 42 Bible Online

Ayub 42 - O‘zbek tilidagi Muqaddas Kitob, 2013 bible

Ayub 42

¹Shunda Ayub Egamizga javob berdi:

²“Ha, bilaman, Sen hamma narsani qila olasan. Sening rejalaringni hech kim buza olmaydi.

³“Bilmay turib, donoligimga gumon qilayotgan kim?” — deb so‘rading. O‘sha menman. O‘zim tushunmaydigan narsalar haqida og‘iz ochdim. Aqlim yetmaydigan ajoyibotlar haqida gapirdim.

⁴Sen: “Qani quloq sol, Men gapiraman. Seni so‘roq qilaman, javob ber”, — deding.

⁵Sen haqingda birovlardan eshitgandim, Ammo endi ko‘zlarim bilan Seni ko‘rib turibman.

⁶Shuning uchun endi aytganlarimni qaytib olaman, Boshimga tuprog‘u kul sochib, tavba qildim.

⁷Ayubga gapirib bo‘lganidan keyin, Egamiz temonlik Elifazga shunday dedi: “Sen va ikki do‘stingdan juda qattiq g‘azabdaman, chunki sen Men haqimda to‘g‘ri so‘zlarni aytmading. Ayub esa to‘g‘ri gapirdi.

⁸Endi yettita buqa va yettita qo‘chqor olib, Ayubning yoniga boringlar. O‘sha yerda o‘z gunohlaringiz uchun Menga kuydiriladigan qurbonlik keltiringlar. Ayub sizlar uchun ibodat qiladi. Men uning ibodatlarini qabul qilaman, sizlarga ahmoqligingizga loyiq jazo bermayman. Sizlar Men haqimda to‘g‘ri so‘zlarni gapirmadingiz. Ayub esa to‘g‘ri gapirdi.”

⁹Shunday qilib, temonlik Elifaz, shuvaxlik Bildad va namaxlik Zo‘far borib, Egamizning aytganlarini qildilar. Egamiz Ayubning ibodatlarini qabul qildi.

¹⁰Ayub o‘z do‘stlari uchun ibodat qilganidan keyin, Egamiz uning boyligini qayta tikladi. Unga oldingidan ikki baravar ko‘p baraka berdi.

¹¹Shunda Ayubning hamma aka–ukalari, opa–singillari, eski tanishlarining barchasi kelishdi. Uning uyida ziyofat qilishdi. Egamiz tomonidan yuborilgan kulfatlar uchun Ayubga hamdardlik bildirib, unga tasalli berishdi. Ularning har biri Ayubga bir bo‘lak kumush va tilla uzuk hadya qildi.

¹²Ayubning qolgan umri davomida Egamiz unga oldingidan ham ko‘proq baraka berdi: bu davrda Ayubning o‘n to‘rt mingta qo‘ylari, olti mingta tuyasi, ming juft ho‘kizi va mingta eshagi bor edi.

¹³Egamiz Ayubga yetti o‘g‘il va uch qiz ham berdi.

¹⁴Ayub birinchi qiziga Yamima, ikkinchisiga Kaziyo, uchinchisiga esa Xaranxappux, deb ot qo‘ydi.

¹⁵Butun yurtda Ayubning qizlariday go‘zal qizlar yo‘q edi. Ayub qizlariga ham aka–ukalari qatori meros berdi.

¹⁶Shundan keyin Ayub yana bir yuz qirq yil yashadi. Farzandlar ko‘rdi, nabiralaru ularning farzandlarini ham ko‘rdi, hammasi bo‘lib to‘rt nasl ko‘rdi.

¹⁷Shunday qilib, Ayub yoshini yashab, oshini oshab, uzoq umr ko‘rib, olamdan o‘tdi.