Read O‘zbek tilidagi Muqaddas Kitob, 2013 Ayub 6 Bible Online

Ayub 6 - O‘zbek tilidagi Muqaddas Kitob, 2013 bible

Ayub 6

¹Shundan keyin Ayub yana gapirdi:

²“Qani endi, qayg‘ularimni o‘lchashning iloji bo‘lsa edi, Mening kulfatlarim tarozida tortib ko‘rilsa edi.

³Ular dengiz qumlaridan ham og‘irroq chiqqan bo‘lar edi. Shuning uchun ham o‘poq–so‘poq gaplar aytdim.

⁴Qodir Xudo otgan nayzalar tanamdadir, Ruhim ularning zahridan ichmoqda. Xudoning barcha dahshatlari menga qarshi tayyorlangan.

⁵Asov eshak o‘t yo‘qligida hangraydi–ku! Ho‘kiz ham ohurida yem bo‘lmasa bo‘kiradi–ku!

⁶Tuzsiz ovqatni yeb bo‘lmaydi–ku! Pishirilmagan tuxum oqi axir, naqadar bemaza!

⁷Ularni ko‘rib ishtaham yo‘qoladi. Ularni yeyishni o‘ylasam ko‘nglim ayniydi.

⁸Qani endi, tilagim bajo bo‘lsa edi, Xudo niyatimni bajo keltirsa edi!

⁹Qani endi, Xudo meni ezib tashlashga rozi bo‘lsa edi, Qo‘liga erk berib, jonimni olsa edi.

¹⁰Ana o‘shanda men tasalli topgan bo‘lardim, Hatto og‘riqlarimga qaramay quvongan bo‘lardim, Chunki Muqaddas Xudoning so‘zlarini men rad qilganim yo‘q.

¹¹Qachongacha kutaman axir, kuchim yetarmikan?! Oxiri nima bo‘ladi o‘zi? Nima uchun sabr–toqat qilishim kerak?!

¹²Men toshday qattiq emasman–ku! Mening tanam temirdan emas–ku!

¹³Yo‘q, o‘zimga o‘zim yordam berolmayman, Hech bir chora–ilojim yo‘q.

¹⁴Qayg‘u–alam tortayotgan inson Qodir Xudodan qo‘rqishni rad qilgan bo‘lsa ham, O‘sha insonga sodiq do‘stlar kerak.

¹⁵Ammo do‘stlarimga ham ishonib bo‘lmaydi, Ular oqib o‘tib ketadigan irmoqlardaydir.

¹⁶O‘sha irmoqlar muzu qor eriganda toshib oqadi,

¹⁷Issiq havoda esa ular qurib qoladi, Kun qiziganda g‘oyib bo‘ladi.

¹⁸Karvonlar bu irmoqlarni qidirib, Yo‘llaridan adashib ketadilar. Yurib–yurib, cho‘lda halok bo‘ladilar.

¹⁹Temo yurtining karvonlari ham suv qidirib keladilar, Shava yurtidan kelganlar ham suvga umid qiladilar.

²⁰Ammo o‘sha irmoqlarga ishonganlar tushkunlikka tushadilar, U yerga borib, gangib qoladilar.

²¹Sizlar ham men uchun xuddi o‘sha irmoqlardaysizlar. Kulfatimni ko‘rib turib, vahimaga tushyapsizlar.

²²Sizlardan biron narsa so‘radimmi?! Yoki boyligingizdan berib, meni qutqaringlar, deb aytdimmi?!

²³Dushmanlarimning qo‘lidan qutqaringlar, dedimmi?! Yoki zo‘ravonlardan meni xalos qilinglar, deb so‘radimmi?!

²⁴Menga o‘rgatinglar, mayli jim turaman. Qanday noto‘g‘ri ish qilganimni tushuntirib beringlar.

²⁵Haqiqat so‘zlari naqadar achchiq! Lekin gaplaringiz nimani isbotlyapti?

²⁶Meni behuda gaplarni aytyapti, deb o‘ylaysiz. Shunday ekan, nimaga tushkunlikda aytganlarimga javob qaytarasiz?!

²⁷Sizlar hatto yetimlar uchun qur’a tashlagan bo‘lardingiz. Do‘stingiz ustidan savdolashib, uni sotgan bo‘lardingiz.

²⁸Endi marhamat qilib menga qaranglar, Men sizlarga yolg‘on gapirmayman.

²⁹Bas endi, nohaqlik qilmang. Axir, mening aybim yo‘q–ku!

³⁰Yo gapimda biror nohaqlik bormi? Tilim yovuzlikning ta’mini ajrata bilmaydimi?!