Read O‘zbek tilidagi Muqaddas Kitob, 2013 Ayub 7 Bible Online

Ayub 7 - O‘zbek tilidagi Muqaddas Kitob, 2013 bible

Ayub 7

¹“Insonning yerdagi mehnati mashaqqatli–ku! Uning kunlari mardikorning kuniga o‘xshaydi–ku!

²Ha, inson soyani qo‘msagan qulga o‘xshaydi! O‘z haqini kutgan mardikordaydir u!

³Menga ham maqsadsizlikka to‘la oylar, Qayg‘uga to‘la tunlar berilgan.

⁴Yotganimda: “Qachon tong otarkan?” — deyman, Lekin tun juda cho‘zilib ketadi, Tong otguncha ag‘nab chiqaman.

⁵Tanamni qurt va yara bosib ketgan, Terim yorilib, yiringlab ketgan.

⁶Kunlarim bo‘zchining mokisidan ham tezroq o‘tadi, Aslo umid bag‘ishlamay o‘tib ketaveradi.

⁷Ey, Xudoyim, hayotim bir nafasday ekanligini yodingda tut, Ko‘zlarim endi hech qachon yaxshilikni ko‘rmaydi.

⁸Hozir meni ko‘rib turibsan, lekin bu uzoqqa cho‘zilmas, Meni qidirasan, lekin men o‘shanda bo‘lmayman.

⁹Bulut tarqalib, yo‘q bo‘lib ketadi. Xuddi shunga o‘xshab, o‘liklar diyoriga ketganlar qaytib kelmaydi.

¹⁰Ular uylariga qaytib kelmaydilar, O‘z yashagan joylarida ularni bilmaydilar.

¹¹Shuning uchun jim bo‘lmay, O‘z dardimni bayon qilaman, Alam–hasratda shikoyat qilaman.

¹²Ey Xudoyim! Nima uchun ustimdan qo‘riqchi qo‘yding? Men dengizmanmi yoki dengiz maxluqimanmi?

¹³“To‘shagim menga tasalli berar, Uyqu dardimni yengillashtirar”, — desam,

¹⁴Tushlar orqali meni qo‘rqitasan, Vahiylar orqali dahshatga solasan.

¹⁵Shunda men, qani endi bo‘g‘ilib qo‘ya qolsam, deyman, Axir, shu jismimda yashashdan ko‘ra, o‘lim afzalroq.

¹⁶Hayotimdan nafratlanyapman, abadiy yashamayman. Hayotim bir nafasday bo‘lsa o‘zi, meni tinch qo‘ygin, axir!

¹⁷Inson kim bo‘libdiki, Unga shunchalik e’tibor bersang?! Odam kim bo‘libdiki, U haqda o‘ylasang?!

¹⁸Har tong uni tekshirib, Har lahzada sinasang?!

¹⁹Bir lahzaga mendan yuz o‘girgin, Tinch qo‘ygin, hech bo‘lmasa bir yutinay.

²⁰Gunoh qilgan bo‘lsam, Senga nima, ey, odamzod qo‘riqchisi?! Nima uchun meni O‘zingga nishon qilib olding?! Sening mendan qasding bormi?!

²¹Nima uchun gunohimni kechirib, Aybimdan forig‘ qilmaysan? Axir, yaqinda tuproqqa qaytaman–ku! Meni qidirganingda esa yo‘q bo‘lib ketgan bo‘laman.