Read O‘zbek tilidagi Muqaddas Kitob, 2013 Ayub 8 Bible Online

Ayub 8 - O‘zbek tilidagi Muqaddas Kitob, 2013 bible

Ayub 8

¹Shuvaxlik Bildad Ayubga shunday dedi:

²“Qachongacha shunday gaplarni gapirasan? Og‘zingdan chiqqan so‘zlar shamolga o‘xshaydi–ya!

³Xudo adolatga xiyonat qiladimi? Qodir Xudo haqiqatning yo‘lini to‘sadimi?

⁴Farzandlaring Unga qarshi gunoh qilgan bo‘lsa, Xudo ularni gunohlari uchun jazoladi.

⁵Xudoga yuz burgin, Qodir Xudoga yolvorgin.

⁶Agar pok va solih bo‘lsang, Albatta U senga qo‘lini uzatib, Seni o‘z haqqoniy joyingga qaytaradi.

⁷Oxiri shunchalik farovon bo‘lasanki, Avvalgi holating nochorday tuyuladi.

⁸Ana, o‘tib ketganlarga qaragin, Ajdodlarimizning qilganlariga e’tibor bergin.

⁹Axir, biz kechagina tug‘ilganmiz, hech narsa bilmaymiz, Hayotimiz ham soyadek o‘tib ketadi.

¹⁰Ajdodlarimiz senga muallim bo‘ladi, Ularning aql–zakovatidan saboq ol.

¹¹To‘qayzor bo‘lmasa qamish o‘sadimi?! Suv bo‘lmagan joyda qamish bo‘y cho‘zadimi?!

¹²Qamishlar hali ko‘karib turgan paytdayoq, Kesilishga tayyor bo‘lmay turib, Hamma o‘tlardan oldin so‘lib qoladi.

¹³Ha, Xudoni unutganlar ham shu ko‘yga tushadi, Betavfiqlarning umidi puchga chiqadi.

¹⁴Ular umid bog‘lagan narsalar juda mo‘rtdir, Ular ishongan narsalar o‘rgimchakning to‘rlaridaydir.

¹⁵Ular o‘z uyiga suyanadilar, ammo uy buzilib ketadi. Uyini mahkam ushlaydilar, lekin uy bardosh bermaydi.

¹⁶Fosiqlar yaxshi sug‘orilgan, Quyosh nuri ostida o‘sayotgan butaga o‘xshaydilar, Novdalari butun bog‘ bo‘ylab yoyilib ketgan.

¹⁷Ildizlari toshlarga chirmashib, O‘sha yerdan o‘ziga joy qidiradi.

¹⁸Lekin ildiz yulib tashlanganda, O‘sgan joyi ham bilinmaydi.

¹⁹Ha, fosiqlarning shodligi uzoqqa cho‘zilmaydi, Boshqalar chiqib, ularning o‘rnini oladi.

²⁰Aybsiz kishini Xudo hech rad qilmaydi, Yovuzlarga esa yordam qo‘lini uzatmaydi.

²¹U hali og‘zingni kulgi bilan to‘ldiradi, Lablaringdan esa shodlik sadosini yangratadi.

²²Sendan nafratlanganlar uyatga qoladilar, Fosiqlarning chodiri vayron bo‘ladi.