Read O‘zbek tilidagi Muqaddas Kitob, 2013 Ayub 9 Bible Online

Ayub 9 - O‘zbek tilidagi Muqaddas Kitob, 2013 bible

Ayub 9

¹Ayub javob berib, shunday dedi:

²“Ha, bilaman, aytganlaringning hammasi to‘g‘ri, Lekin qanday qilib inson Xudoning nazarida haq bo‘la oladi?

³Agar biror inson Xudo bilan bahsga kirishsa, U Xudoning mingta savolidan bittasiga ham javob bera olmasdi.

⁴Ha, Xudo dono va qudratlidir, Kim Xudoga qarshi chiqib, Undan ustun bo‘lgan?!

⁵Xudo ogohlantirmay tog‘larni ag‘daradi, G‘azab alangasida ularni yiqitadi.

⁶Yerni joyidan qo‘zg‘atib, silkitadi, Zamin ustunlarini titratadi.

⁷Quyoshga amr bersa, u nur sochmaydi, Yulduzlarning nurini o‘chirishga qodir Xudo U.

⁸Uning O‘zi samoni yoygan, Dengiz to‘lqinlarini toptab yuradi.

⁹Hulkar yulduzini, Katta ayiq burji va Parvin yulduzlarini, Butun janubdagi yulduz turkumlarini yaratgan Xudodir U.

¹⁰Inson aqli bovar qilmaydigan buyuk ishlar qiladi Xudo, U qilgan mo‘jizalarning son–sanog‘i yo‘qdir.

¹¹U yonginamdan o‘tib ketsa ham, Men Uni ko‘ra olmayman. O‘z yo‘lida davom etib ketaveradi, Uning o‘tganini payqamay qolaman.

¹²U olib qo‘yaman, desa, kim to‘xtata oladi?! Kim Undan: “Nima qilyapsan?” deb so‘ray oladi?!

¹³Xudo O‘z g‘azabini tutib turmaydi, Hatto maxluq Rahob yordamchilari Uning oyog‘i ostida qaltiraydi.

¹⁴Men kim bo‘libmanki, Unga javob bera olsam, U bilan bahslashish uchun kerakli so‘zlar tilimga kelsa?!

¹⁵Aybsiz bo‘lsam ham, Unga javob bera olmagan bo‘lardim, Hakamdan faqat rahm–shafqat tilagan bo‘lardim.

¹⁶Agar Uni chaqirsam, U menga javob bersa ham, Gaplarimga quloq solishiga ishonmayman.

¹⁷Xudo bo‘ron chaqirib, meni ezmoqda, Hech bir sababsiz yaralarimni ko‘paytirmoqda.

¹⁸Nafasimni rostlab olishga ham imkon bermayapti, Yuragimni qayg‘uga to‘ldiryapti.

¹⁹Agar kuch sinalsa, albatta U eng kuchlisi bo‘lib chiqadi. Odillik masalasida esa kim Uni mahkamaga chaqirib keladi?!

²⁰Gunohsiz bo‘lsam ham, o‘z og‘zim meni aybdor, deb topadi, Aybsiz bo‘lsam ham, o‘z og‘zim meni egri, deb hukm qiladi.

²¹Aybsizman, ammo menga baribir, O‘z hayotimdan nafratlanyapman.

²²Eh, hammasi baribir ekan, shuning uchun ham: “U aybsizni ham, fosiqni ham halok qiladi”, deb aytaman.

²³Kulfat kutilmaganda odamga o‘lim keltirsa, Aybsizning boshiga tushgan ofatdan Xudo kuladi.

²⁴Butun yer yuzi fosiqlar qo‘lida, Xudo hakamlarning ko‘zlarini bog‘lab qo‘ygan. Agar U bog‘lamagan bo‘lsa, Yana kim bog‘lagan bo‘lishi mumkin?!

²⁵Hayotim chopog‘on kishidan ham tezroq o‘tib ketadi. Shunchalik tezki, hech farog‘at ko‘rmay o‘tib ketaman.

²⁶Umrim tez suzadigan qayiqlarday ko‘zga ko‘rinmay ketadi, O‘z o‘ljasiga tashlangan burgutday tezdir.

²⁷“Endi hech nolimayman, Qayg‘uli chehram yorishsin, Xursand bo‘lay”, degim keladi,

²⁸Lekin yanada ko‘proq keladigan g‘am–alamdan qo‘rqaman. Axir, Sen meni aybsiz hisoblamaysan.

²⁹Modomiki, aybdor ekanman, Harakat qilishimdan nima foyda bor?

³⁰Qor suvida cho‘milib, Qo‘llarimni sovun bilan yuvsam–da,

³¹Ey Xudo, Sen meni loy chuqurga tashlaysan, Hatto kiyimlarim ham mendan nafratlanadi.

³²Xudo inson emaski, men U bilan bahslashsam, Men bilan da’volashgin, deb Uni chaqirsam.

³³Ikkimiz oramizda hakam yo‘qki, Bizni ajrim qilsa.

³⁴Hakam bo‘lganda, Xudoning tayog‘ini ustimdan olib tashlagan bo‘lardi, O‘shanda Xudo meni boshqa dahshatga solmasdi.

³⁵Qo‘rqmasdan Unga gapira olgan bo‘lardim, Lekin hozirgi ahvolimda unday qilolmayman.