Read O‘zbek tilidagi Muqaddas Kitob, 2013 Zabur 102 Bible Online

Zabur 102 - O‘zbek tilidagi Muqaddas Kitob, 2013 bible

Zabur 102

¹Dovud sanosi. [1] Egamizni olqishlagin, ey jonim, Uning muqaddas nomini olqishla, ey vujudim!

²Egamizni olqishlagin, ey jonim, U qilgan hamma yaxshiliklarini unutma!

³Hamma gunohlarimni U kechiradi, Barcha xastaliklarimga U shifo beradi.

⁴Meni qabrdan U qutqaradi, Sevgi, shafqat ila menga toj kiygizadi.

⁵Hayotimni [1] ne’mat ila U qondiradi, Yoshligim burgutnikiday qilib yangilandi.

⁶Egamiz to‘g‘ri ish qiladi, Mazlumlarga adolat qiladi.

⁷O‘z yo‘llarini U Musoga ma’lum qilgan, Ishlarini Isroil xalqiga namoyon etgan.

⁸Egamiz rahmdil, inoyatlidir, Jahli tez chiqmaydi, sodiq sevgisi mo‘ldir.

⁹U doimo bizni ayblamaydi, Yoki to abad g‘azabini sochmaydi.

¹⁰Bizni U gunohlarimizga qarab jazolamas, Yomonliklarimizga qarab qaytarmas.

¹¹Samolar zamindan naqadar balanddir! Egamizning sodiq sevgisi ham Undan qo‘rqqanlarga shunday yuksakdir!

¹²Sharq g‘arbdan qanchalik uzoq bo‘lsa, Gunohlarimizni bizdan shu qadar uzoq qiladi.

¹³Ota bolalariga shafqat qilganday, Egamiz O‘zidan qo‘rqqanlarga rahm qiladi.

¹⁴Biz qanday yasalganimizni U biladi, Biz tuproq ekanimizni [2] U yodida tutadi.

¹⁵Insonmiz, maysaga o‘xshar umrimiz, Dasht guliga o‘xshab gullaymiz.

¹⁶Shamol esar, maysa yo‘q bo‘lar, Uni o‘z joyi eslamay qo‘yar.

¹⁷Ammo Egamizning sodiq sevgisi Abadulabad Undan qo‘rqqanlar bilan birgadir! Uning sodiqligi esa ularning nasliga o‘tadi.

¹⁸Ha, Egamizning sadoqati Uning ahdiga rioya qilganlaru Uning amrlariga sadoqat ila itoat etganlar bilan birgadir.

¹⁹Egamiz taxtini o‘rnatgandir samoda, Uning shohligi hukmrondir hamma yerda.

²⁰Egamizni olqishlang, ey Uning farishtalari, Uning amrini ijro qiluvchi bahodirlar, Uning so‘zlariga itoat etuvchilar!

²¹Ey Egamizning samoviy lashkarlari! Uning irodasini ijro etuvchi xizmatkorlari! Egamizni olqishlang!

²²Ey Egamiz yaratganlarning hammasi! U hukmron bo‘lgan har bir joyda Uni olqishlanglar! Ey jonim! Egamizni olqishla!