Read O‘zbek tilidagi Muqaddas Kitob, 2013 Zabur 104 Bible Online

Zabur 104 - O‘zbek tilidagi Muqaddas Kitob, 2013 bible

Zabur 104

¹Egamizga shukr ayting, Unga sajda qiling, Boshqa xalqlar orasida Uning ishlarini bildiring.

²Tarannum qilib Uni, hamdu sano ila qo‘shiq ayting, Uning jamiki ajoyib ishlarini aytib bering.

³Egamizning muqaddas nomi ila faxrlaning, Egamizga yuz burganlarning qalbi shodlikka to‘lsin.

⁴Egamizga yuz buring! Uning qudratiga, Uning huzurida bo‘lishga intiling.

⁵[5-6] Ey sizlar, Egamizning quli Ibrohim nasli, Ey Yoqub o‘g‘illari — Egamizning tanlaganlari, Esda tuting Egamiz qilgan ajoyibotlarni, Uning mo‘jizalarini, chiqargan hukmlarini.

⁷U Egamiz Xudodir, U chiqargan hukmlar butun yer yuzidadir.

⁸O‘z ahdini U to abad yoddan chiqarmas, Minglab nasllarga bergan va’dasini unutmas.

⁹Rioya qilar U Ibrohim bilan qilgan ahdiga, Is’hoqqa qasam ichib bergan va’dasiga.

¹⁰Yoqub uchun bu ahdni bir qonun qildi, Ha, Isroil uchun abadiy bir ahd qildi.

¹¹Aytdiki [1]: “Kan’on yurtini senga beraman, Uni mulk uchun ulush qilib beraman.”

¹²U zamon ularning soni kam edi, Ha, juda kam edilar. Ular bu yurtga kelgindi edi.

¹³Kezardi bir xalqdan boshqasiga, Bir shohlikdan boshqa yurtga.

¹⁴Hech kim ularni ezishlariga Egamiz yo‘l qo‘ymadi, Ularni deb shohlarga tanbeh berdi.

¹⁵Aytdiki: “Men tanlaganlarga tegmanglar, Payg‘ambarlarimga [2] zarar keltirmanglar.”

¹⁶Kan’on yurti ustiga Egamiz ocharchilik yubordi, Bitta qoldirmay yeguliklarga qirg‘in keltirdi.

¹⁷Ulardan oldin odam yubordi, Ha, Yusuf [3] qul kabi sotildi.

¹⁸Uning oyoqlariga zanjir urildi, Bo‘ynidan temir halqa o‘tkazildi.

¹⁹Yusufning so‘zlari bajo bo‘ladigan vaqt kelguncha, Egamizning kalomi Yusufni sinadi.

²⁰Misr shohi odam yuborib, Yusufni qutqardi, Ellarning hukmdori uni ozod qildi.

²¹Yusufni shoh saroyining boshqaruvchisi qilib tayin etdi, Jamiki mulkining hokimi qildi.

²²Xohlasa saroydagi a’yonlarimni zanjirband qilsin [4], Maslahatchilarimga donolik ila o‘git bersin, deb shunday qildi.

²³So‘ngra Isroil Misrga keldi, Ha, Yoqub nasli Xom [5] yurtida musofir bo‘ldi.

²⁴Uning xalqini Egamiz barakali qildi, Dushmanlariga qaraganda, ko‘paytirdi.

²⁵Egamiz Misr xalqining yuraklarini o‘zgartirdi, Ular Egamiz xalqidan nafratlandi, Egamizning qullariga qarshi ular fitna uyushtirdi.

²⁶So‘ngra Egamiz quli Musoni yubordi, Tanlab olgan Horunni birga jo‘natdi.

²⁷Misrliklar orasida, o‘sha Xom yurtida Ikkalasi Egamizning mo‘jizalarini, ajoyibotlarini ko‘rsatdi [6].

²⁸Egamiz zulmat yubordi, Misrni zulmatga burkadi, Muso, Horun Egamizning amrlariga itoatsizlik qilmadi [7].

²⁹Misrning suvlarini Egamiz qonga aylantirdi, Jamiki baliqlarini nobud qilib tashladi.

³⁰Misr yurti to‘lib ketdi qurbaqalarga, Yetib bordi hatto hukmdorlarning uyiga.

³¹Egamiz amr berganda, so‘nalar galasi keldi, Misr bo‘ylab burgalar qaynab ketdi.

³²Yomg‘ir o‘rniga ularga Egamiz do‘l yog‘dirdi, Butun Misr bo‘ylab chaqmoq chaqtirdi.

³³Uzumzoru anjirzorlarini quritdi, Misrdagi daraxtlarni qo‘porib tashladi.

³⁴Egamiz amr berganda, chigirtkalar [8] keldi, Son–sanoqsiz mayda chigirtkalar chiqib keldi.

³⁵Ular Misrdagi butun o‘t–o‘lanni yeb yubordi, Misr o‘lkasidagi hosilni yeb bitirdi.

³⁶Misrdagi jamiki to‘ng‘ichlarni Egamiz urdi, Ularning qudratining ilk hosilini yo‘q qildi.

³⁷So‘ng Egamiz O‘z xalqini Oltinu kumushga boyitib [9], olib chiqdi. Isroil qabilalarining orasida qoqilib qolgani bo‘lmadi.

³⁸Misrliklar Isroildan qo‘rqib, vahimaga tushgandi, Ular ketganlarida, Misr xalqi sevindi.

³⁹Xalqim ustida yopinchiq bo‘lsin, deb Egamiz bulutni yoydi, Kechasi yorug‘lik bo‘lsin, deb alanga berdi [10].

⁴⁰Isroil go‘sht so‘raganda Egamiz bedanalar berdi, Osmondan non yog‘dirib, ularni to‘yg‘azdi [11].

⁴¹Egamiz qoyani ochdi, suv otilib chiqdi [12], Sahro bo‘ylab daryoday suv oqdi.

⁴²Egamiz O‘zining muqaddas va’dasini, O‘z quli Ibrohimga bergan va’dasini yodda tutdi.

⁴³Shu bois xalqini olib chiqdi sevinch ila, O‘z tanlaganlarini shodlik hayqiriqlari ila.

⁴⁴Begona xalqlarning yurtlarini ularga berdi, O‘sha xalqlarning boyligini Isroil mulk qilib oldi.

⁴⁵“Isroil xalqi Mening farmonimga rioya qilsin, Mening qonunlarimga itoat etsin”, deya Egamiz mana shularning hammasini qildi. Egamizga hamdu sanolar bo‘lsin!