Read O‘zbek tilidagi Muqaddas Kitob, 2013 Zabur 105 Bible Online

Zabur 105 - O‘zbek tilidagi Muqaddas Kitob, 2013 bible

Zabur 105

¹Egamizga hamdu sanolar bo‘lsin! Egamizga shukrona ayting, U yaxshidir! Uning sodiq sevgisi abadiydir.

²Egamizning qudratli ishlarini kim batafsil ayta oladi?! Kim Unga mukammal hamdu sano ayta oladi?!

³Baxtlidir adolat ila ish tutganlar, Har doim to‘g‘ri ish qilganlar.

⁴Ey Egam, xalqingga muruvvat ko‘rsatganingda meni eslagin, Ularga najot berganingda, menga ham yordam bergin,

⁵Toki tanlagan xalqingning iqbolini ko‘rayin, Xalqingning shodligini ko‘rib, men ham quvonayin, Ular bilan birga faxrlanib yurayin.

⁶Ey Isroil xalqi, ota–bobolarimiz kabi biz gunoh qildik, Egri yo‘ldan yurdik, yomonlik qildik.

⁷Ota–bobolarimiz Misrda bo‘lganlarida, Egamizning ajoyib ishlariga e’tibor qilmadilar, Uning mo‘l sodiq sevgisini eslamadilar, Qizil dengizda [1] isyon qildilar.

⁸Qudratli kuchini bildirish uchun, O‘z nomi haqi, Egamiz ularni qutqardi.

⁹U Qizil dengizga do‘q urdi, dengiz quridi. Qup–quruq yerdan yetaklaganday, Isroil xalqini dengiz tubidan o‘tkazdi [2].

¹⁰Egamiz ularni yov qo‘lidan qutqardi, G‘anim qo‘lidan ularni ozod qildi.

¹¹Suvlar qaytib, g‘animlarni bosib qoldi, Dushmanlarning birontasi qutula olmadi.

¹²Shunda Isroil xalqi Egamizning so‘ziga ishondi, Unga hamdu sanolar kuyladi.

¹³Ular tez orada Egamizning ishlarini unutdi, Egamizdan bemaslahat ish qildilar.

¹⁴Sahroda ular nafsi buzuqlik qildi, Dashtu biyobonda ular Xudoni sinadi [3].

¹⁵Egamiz ularga so‘raganini berdi–yu, Ularga halokatli xastalikni ham yubordi.

¹⁶Qarorgohdagi xalq Musoga, Egamizga bag‘ishlangan Horunga hasad qildi [4].

¹⁷Yer yorilib, Datanni yutib yubordi, Abiram bilan sheriklarini yamlab yubordi.

¹⁸Sheriklari ustiga olov tushdi, O‘sha fosiqlarni alanga yondirdi.

¹⁹Sinay tog‘ida [5] ular buzoq yasadilar, O‘sha oltin butga sajda qildilar [6].

²⁰Ular Xudoning ulug‘vorligini O‘t yeydigan buqa tasviriga alishdilar.

²¹Ular o‘zlarining najotkori Xudoni, U Misrda buyuk ishlar qilganini unutdilar.

²²Xom [7] yurtida Egamiz ajoyibotlar ko‘rsatgandi, Qizil dengizda qo‘rqinchli ishlar qilgandi. Mana shularni Isroil xalqi unutdi.

²³Shu bois Egamiz, ularni qiraman, dedi. Ammo Muso, Egamizning tanlagani o‘rtaga tushib, Egamizdan iltijo qilib, Uni qahrli g‘azabidan qaytardi.

²⁴So‘ngra ular maftunkor yurtni xor qildilar, Egamizning va’dasiga ishonmadilar [8].

²⁵O‘z chodirlarida ming‘irlab nolidilar, Egamizga itoat etmadilar.

²⁶Egamiz qo‘lini ko‘tarib, ont ichdi: “Sizlarni sahroda yakson qilaman.

²⁷Naslingizni xalqlar orasiga tarqataman, Boshqa yurtlarga ularni sochib yuboraman.”

²⁸So‘ngra bizning ota–bobolarimiz Piyor tog‘idagi Baalga sajda qilishga qo‘shildilar [9], O‘liklarga [10] keltirilgan qurbonlikdan yedilar.

²⁹Ular qilmishlari bilan Egamizni g‘azablantirdilar, Ular o‘latga giriftor bo‘ldilar.

³⁰Finxaz qo‘zg‘alib, aralashdi, Shunda o‘lat ham to‘xtadi.

³¹Shu bois Finxaz solihlik timsoli bo‘ldi, Bu nasllardan nasllarga to abad davom etadi.

³²Mariva suvlarida [11] ular Egamizning qahrini keltirdi, Ularning dastidan Musoning boshiga qayg‘ular keldi.

³³Ular Musoning g‘azabini qo‘zg‘atdi, Muso ham o‘ylamay gapirdi.

³⁴Egamiz, xalqlarni qiringlar, deb amr bergandi, Ular Egamizning amrini bajarmadi.

³⁵Begona xalqlar bilan ular aralashib, Ularning odatlarini o‘rgandilar.

³⁶Ular begona xalqlarning butlariga sajda qildilar, Ularning butlari Egamizning xalqiga tuzoq bo‘ldi.

³⁷Ular o‘zlarining o‘g‘il–qizlarini Iblislarga qurbon qildilar.

³⁸Ha, o‘zlarining o‘g‘il–qizlarini Kan’on butlariga qurbon qilib, Begunoh qon to‘kdilar. Ularning qoni yurtni harom qildi.

³⁹Ishlari bilan o‘zlarini bulg‘adilar, Qilmishlari bilan Egamizga bevafolik qildilar.

⁴⁰Shunda Egamiz O‘z xalqidan g‘azablandi, Ulardan jirkandi.

⁴¹Ularni yot xalqlarning qo‘liga berdi, G‘animlari ular ustidan hukmron bo‘ldi.

⁴²Dushmanlari ularni siquvga oldi, Kuch bilan ularni bo‘yin egdirdi.

⁴³Ko‘p marta Egamiz ularni qutqardi, Ular esa ataylab isyon qilgan edi, Gunohlari tufayli past ketdilar.

⁴⁴Shunda ham Egamiz O‘z xalqining nolalarini eshitib, Ularning kulfatlariga e’tibor berdi.

⁴⁵Ular haqi O‘z ahdini yodida tutdi, Mo‘l sodiq sevgisi bilan ularga shafqat ko‘rsatdi.

⁴⁶Ularni asir olganlarni Shafqatli bo‘lishga undadi.

⁴⁷Ey Egamiz Xudo, bizlarni qutqar, Xalqlar orasidan bizni to‘plab ol, O‘zing muqaddassan, Senga shukr aytaylik, Sening madhlaring bilan faxrlanaylik.

⁴⁸Isroil xalqining Xudosi — Egamizga To abad olqishlar bo‘lsin, Jamiki xalqlar: “Omin”, desin. Egamizga hamdu sanolar bo‘lsin!