Read O‘zbek tilidagi Muqaddas Kitob, 2013 Zabur 106 Bible Online

Zabur 106 - O‘zbek tilidagi Muqaddas Kitob, 2013 bible

Zabur 106

¹“Egamizga shukrona ayting, U yaxshidir, Uning sodiq sevgisi abadiydir”, deb

²Egamiz najot berganlar ana shunday aytsin, U kulfatdan qutqarganlar ana shunday aytsin.

³U sharqu g‘arbdan, shimolu janubdan [1] to‘plaganlar ham, Ko‘p yurtlardan yig‘ib keltirganlar ham ana shunday aytsin.

⁴Ba’zilari cho‘lu biyobonda tentirab yurdilar, Yashash uchun biron shaharga yo‘l topmadilar.

⁵Och, tashna holda qoldilar, Sal bo‘lmasa o‘layozdilar.

⁶Kulfatda qolganlarida Egamizga nola qildilar, Egamiz ularni azob–uqubatlardan qutqardi.

⁷Ular yashaydigan shaharga borgunga qadar, Egamiz ularni to‘g‘ri yo‘ldan yetakladi.

⁸Sodiq sevgisi uchun ular Egamizga shukrona aytsin! Egamizning insoniyatga ko‘rsatgan ajoyib ishlari uchun shukr qilsin!

⁹Zotan U qondirar tashna bo‘lganlarni, To‘ydirar ne’matlar bilan ochlarni.

¹⁰Ba’zilari zim–ziyo zulmatda o‘tirardilar, Asir bo‘lib, kishanda azob chekardilar.

¹¹Ular Xudoning so‘zlariga qarshi isyon qilgandilar, Xudoyi Taoloning yo‘l–yo‘riqlarini mensimadilar.

¹²Shu bois Xudo ularni og‘ir ishlarga majbur etdi, Ular yiqilganda, yordam berishga biron kimsa bo‘lmadi.

¹³Kulfatda qolganlarida Egamizga nola qildilar, Egamiz ularni azob–uqubatlardan qutqardi.

¹⁴Ularni zim–ziyo zulmatdan olib chiqdi, Ularning kishanlarini parcha–parcha qildi.

¹⁵Sodiq sevgisi uchun ular Egamizga shukrona aytsin! Egamizning insoniyatga ko‘rsatgan ajoyib ishlari uchun shukr qilsin!

¹⁶Zotan U bronza darvozalarni sindirar, Temir tambalarni ikkiga bo‘lib tashlar.

¹⁷Ba’zilari ahmoq bo‘lib, itoatsizlik qildilar, Gunohlari tufayli azobga duchor bo‘ldilar.

¹⁸Har qanday ovqatdan jirkanar edilar, O‘lim og‘ziga yaqinlashib qolgan edilar.

¹⁹Kulfatda qolganlarida Egamizga nola qildilar, Egamiz ularni azob–uqubatlardan qutqardi.

²⁰Egamiz gapirib, ularga shifo berdi, Qabrdan ularni saqlab qoldi.

²¹Sodiq sevgisi uchun ular Egamizga shukrona aytsin! Egamizning insoniyatga ko‘rsatgan ajoyib ishlari uchun shukr qilsin!

²²Shukrona qurbonligini ular keltirsinlar, Uning ishlarini sevinch qo‘shiqlari ila aytsinlar.

²³Ba’zilari kemalarda dengizga chiqdilar, Vahimali suvlar uzra savdo qildilar.

²⁴Ular Egamizning ishlarini, Chuqur suvda Uning mo‘jizalarini ko‘rdilar.

²⁵U amr berganda, bo‘ron qo‘zg‘aldi, Dengiz to‘lqinlari baland ko‘tarildi.

²⁶Kema osmonga ko‘tarilib, yana chuqur suvga tushdi, Falokatdan kemadagilar bemajol bo‘lib qoldi.

²⁷Ular mastlar kabi dovdirab aylandi, Mahoratlari foyda bermadi.

²⁸Kulfatda qolganlarida Egamizga nola qildilar, Egamiz ularni azob–uqubatlardan qutqardi.

²⁹U bo‘ronni shabadaga aylantirdi, Dengiz to‘lqinlari sukutga cho‘mdi.

³⁰To‘lqinlar jim bo‘lganidan ular sevindi, Istagan bandargohga ularni keltirib qo‘ydi.

³¹Sodiq sevgisi uchun ular Egamizga shukrona aytsin! Egamizning insoniyatga ko‘rsatgan ajoyib ishlari uchun shukr qilsin!

³²Ular jamoa oldida Egamizni ulug‘lasin, Oqsoqollar yig‘inida Unga hamdu sanolar aytsin.

³³Egamiz daryolarni sahroga aylantirar, Buloqlarni qaqragan yerga aylantirar.

³⁴Aholining fosiqligi sababli esa Hosildor yerlarni sho‘r yerga aylantirar.

³⁵Egamiz sahroni ko‘llarga aylantirar, Qaqragan yerni buloqlarga aylantirar.

³⁶Och–yupunlarni u yerga olib kelib o‘rnashtirar. Ular esa yashash uchun shaharlar qurar.

³⁷Dalalarga urug‘ ekib, uzumzorlar yaratar, Dalalardan mo‘l–ko‘l hosil olar.

³⁸Egamizning barakasi ila ular juda ko‘payar, Ularning chorvasi kamayishiga Egamiz yo‘l qo‘ymas.

³⁹[39-40] Egamiz aslzodalarni xor qildi, Yo‘lsiz sahroda ularni sargardon qildi. Zulm, kulfat, g‘amdan Ularning soni kamaydi, Ular qashshoqlashdi.

⁴¹Yo‘qsillarni esa Egamiz kulfatdan qutqarar, Ularning oilasini qo‘y suruviday ko‘paytirar.

⁴²To‘g‘ri insonlar buni ko‘rib, sevinar, Fosiqlar esa og‘zini yopib, jim bo‘lar.

⁴³Donolar bularga e’tibor bersin, Egamizning sodiq sevgisini anglasin.