Read O‘zbek tilidagi Muqaddas Kitob, 2013 Zabur 107 Bible Online

Zabur 107 - O‘zbek tilidagi Muqaddas Kitob, 2013 bible

Zabur 107

¹Dovud sanosi. Qo‘shiq.

²Ey Xudo, yuragim Senga sodiq, Jonim boricha Seni kuylab, qo‘shiq aytaman.

³Uyg‘on, ey arfa, lira! Tongni ham men uyg‘otaman!

⁴Ey Egam, xalqlar orasida Senga shukrona aytaman, Ellar orasida Senga hamdu sano kuylayman.

⁵Sodiq sevging samolarday yuksakdir, Sadoqating bulutlarga cho‘zilgandir.

⁶Ey Xudo, falakdan ham yuqorida yuksalaver! Shuhrating butun zamin uzra yoyilsin.

⁷O‘ng qo‘ling ila g‘alaba ato qilgin, Menga javob bergin, O‘zingning sevganlaring topsin najot.

⁸Ey Xudo, O‘z muqaddas makoningdan va’da bergansan [1]: “Shodlanib Shakamni [2] bo‘lib tashlayman, Suxo‘t vodiysini [3] taqsimlab beraman.

⁹Gilad Menikidir, Manashe [4] Menikidir, Efrayim dubulg‘amdir, Yahudo [5] saltanat hassamdir.

¹⁰Mo‘ab Mening qo‘lyuvgichimdir, Edom uzra chorig‘imni otaman [6], Filistlar [7] uzra zafar ila hayqiraman.”

¹¹Eh, qaniydi mustahkam shaharga [8] meni olib borsalar, Edomga meni boshlab borsalar.

¹²Ey Xudo, axir, bizni O‘zing rad etding–ku! Lashkarimizga yo‘lboshchilik qilmayapsan–ku endi!

¹³Dushmandan qutqarib, bizga yordam ber, Insonning yordami butunlay behuda.

¹⁴Ey Xudo, Sen bilan biz g‘olib bo‘lamiz, Dushmanlarimizni Sen yanchib tashlaysan.