Read O‘zbek tilidagi Muqaddas Kitob, 2013 Zabur 108 Bible Online

Zabur 108 - O‘zbek tilidagi Muqaddas Kitob, 2013 bible

Zabur 108

¹Ijrochilar rahbariga. Dovud sanosi. [1] Seni olqishlayman, ey Xudo, Sukut saqlamagin.

²Fosiq, yolg‘onchilar menga qarshi og‘iz ochgan, Yolg‘onchi tillar bilan menga qarshi gapirar.

³Nafratga to‘la so‘zlarni ustimga yog‘dirarlar, Sababsiz menga hujum qilarlar.

⁴Menga ayb qo‘yarlar do‘stligimga javoban, Ibodat qilaman hamon.

⁵Yaxshilik evaziga menga yomonlik qaytararlar, Do‘stligim evaziga menga adovat qilarlar.

⁶Fosiqni ularga qarshi qo‘y, Ularning o‘ng tomonida ayblovchi tursin.

⁷Sinalganda, ular aybdor bo‘lsin, Ularning ibodati gunoh deb hisoblansin.

⁸Ularning umri qisqa bo‘lsin, Yo‘lboshchiligini boshqasi olsin.

⁹Yetim bo‘lib qolsin bolalari, Beva bo‘lib qolsin xotinlari.

¹⁰Bolalari kulbasidan ayrilib, darbadar bo‘lsin, Non izlab tilanchi bo‘lsin.

¹¹Mol–holini sudxo‘rlar egallasin, Mehnat samarasini begonalar tortib olsin.

¹²Biron kimsa ularga shafqat qilmasin, Ularning yetim bolalariga hech kim achinmasin.

¹³Ularning nasl–nasabi qirilib ketsin, Bir nasldan so‘ng nomlari yo‘q bo‘lsin.

¹⁴Ey Egamiz! Otalari aybini esga olgin, Onalarining gunohini hech qachon unutmagin.

¹⁵Ey Egamiz, ularning gunohidan doim xabardor bo‘lgin, O‘sha insonlarning xotirasini yer yuzidan o‘chirgin.

¹⁶Axir, ular hech qachon shafqat qilishni o‘ylamadi. Muhtojlarni, umidsizlikka tushganlarni, Kambag‘allarni ta’qib qildi, o‘ldirdi.

¹⁷Ular la’natlashni yaxshi ko‘rardi, Endi la’nati o‘zlarining boshiga kelsin. Duo qilishni yoqtirmasdi, Endi duo ulardan uzoq bo‘lsin [1].

¹⁸La’natni ular kiyimday kiyardi, Ularning tanasiga la’nat suv kabi kirardi, Suyaklariga moy kabi singardi.

¹⁹Ha, kiyim kiyganday, ular la’natga o‘ranib olsin, La’natni har kuni belga taqadigan kamarday qilib olsin.

²⁰Ey Egam! Menga qarshi yomon gapiruvchilarga, Meni ayblovchilarga Sendan ana shular mukofot bo‘lsin.

²¹Sen, ey Egam Rabbiy, O‘z noming haqi menga madad ber, Ezgudir sodiq sevging, meni qutqar.

²²Men bir bechora, yo‘qsilman, Ichimda yuragim yaralangandir.

²³Oqshomgi soyaday yo‘q bo‘lib boryapman, Chigirtkaday men uloqtirilganman.

²⁴Ro‘za tutganimdan tizzalarimda darmon yo‘q, Etim suyagimga yopishib qolgan.

²⁵Dushmanlarim haqoratining nishoniman, Meni ko‘rganlarida masxaralab, boshlarini chayqashar.

²⁶Ey Egam Xudo, menga madad bergin, Sodiq sevging haqi meni xalos qilgin.

²⁷Buni Sening qo‘ling qilganini dushmanlarim bilsin, Ey Egam, menga najot bergan Sen ekaningni ular bilsin.

²⁸Mayli, ular meni la’natlasin, Sen esa menga baraka berasan. Ular hujum qilganda, sharmanda bo‘lishsin, Men, Sening quling esa shod–xurram bo‘lay.

²⁹Meni ayblovchilar badnomlikka burkansin, Chopon kiyganday, sharmandalikka o‘ransin.

³⁰Egamga cheksiz shukronalar aytaman, Xaloyiq orasida Unga hamdu sano o‘qiyman.

³¹Egamiz turar yo‘qsullarning o‘ng tomonida, Ularni o‘limga mahkum etganlardan qutqarmoq uchun.