Read O‘zbek tilidagi Muqaddas Kitob, 2013 Zabur 113 Bible Online

Zabur 113 - O‘zbek tilidagi Muqaddas Kitob, 2013 bible

Zabur 113

¹[1-2] Isroil xalqi Misrdan chiqib ketganda, Yahudo yurti Xudoning muqaddas maskani bo‘ldi. Ha, Yoqub xonadoni begona yurtdan ketganda, Isroil yurti Xudoning shohligi bo‘ldi.

³Dengiz Xudoni ko‘rdi–yu, qochdi [1], Iordan daryosi orqaga qaytdi [2].

⁴Tog‘lar qo‘chqorlar kabi sakradi [3], Tepaliklar qo‘zilar kabi irg‘idi.

⁵Ne bo‘ldi, ey dengiz, qochib ketding? Ne bo‘ldi, ey Iordan, orqaga qaytding?

⁶Ey tog‘lar, nechun sakradingiz takalar kabi? Ey tepaliklar, nechun irg‘idingiz qo‘zilar kabi?

⁷Titragin, ey zamin, Rabbiy oldida, Yoqubning Xudosi huzurida.

⁸U qoyani suv hovuziga aylantirgan, Qattiq qoyani buloqqa aylantirgan [4].

⁹Ey Egam! Sodiq sevging, sadoqating haqi Senga sharaflar bo‘lsin! Bizga emas, Senga sharaflar bo‘lsin!

¹⁰Nima uchun begona xalqlar: “Qani ularning Xudosi”, deya aytarlar?

¹¹Bizning Xudoyimiz samolardadir, U istaganini qilaveradi.

¹²Xalqlarning xudolari esa kumush, oltindan, Inson qo‘llarining mahsullaridir.

¹³Butlarning og‘izlari bor, so‘zlay olmaslar, Ko‘zlari bor, ko‘ra olmaslar.

¹⁴Ularning quloqlari bor, eshita olmaslar, Burunlari bor, hidlay olmaslar.

¹⁵Ularning qo‘llari bor, seza olmaslar, Oyoqlari bor, yura olmaslar, Bo‘g‘izlaridan ovoz chiqara olmaslar.

¹⁶Butlarni barpo qilganlar, butlarga ishonganlar Xuddi ularga o‘xshagan bo‘lib qolar.

¹⁷Ey Isroil xalqi! Ishoning Egamizga, U madad berar, qalqon bo‘lar sizga!

¹⁸Ey Horun xonadoni! [5] Ishoning Egamizga, U madad berar, qalqon bo‘lar sizga!

¹⁹Ey Egamizdan qo‘rqqanlar! Ishoning Egamizga, U madad berar, qalqon bo‘lar sizga!

²⁰Egamiz bizni yodda tutib, baraka beradi, Isroil xalqiga U baraka beradi, Horun xonadoniga U baraka beradi.

²¹Egamiz O‘zidan qo‘rqqanlarga baraka beradi, Kattayu kichikka bir xilda baraka beradi.

²²Egamiz sizlarni, Bolalaringizni ko‘paytirsin.

²³Osmonu yerni yaratgan Egamiz sizlarga baraka bersin.

²⁴Samolar Egamizning samolaridir, Yerni esa U insonlarga bergandir.

²⁵O‘lim sukunatiga botganlar — o‘liklar Egamizga hamdu sano aytmaslar.

²⁶Biz esa Egamizga hozir ham, abadulabad Olqishlar aytamiz. Egamizga hamdu sanolar bo‘lsin!