Read O‘zbek tilidagi Muqaddas Kitob, 2013 Zabur 131 Bible Online

Zabur 131 - O‘zbek tilidagi Muqaddas Kitob, 2013 bible

Zabur 131

¹Ziyorat qo‘shig‘i. [1] Ey Egam, eslagin Dovudni, U tortgan barcha azob–uqubatlarni!

²Ey Egam, u Senga qasam ichgandi. Ey Yoqubning qudratli Xudosi, U Senga va’da bergandi:

³“Men aslo uyimga kirmayman, Yoki o‘rnimga yotmayman.

⁴[4-5] Ko‘zlarimga uyqu bermayman, Qovoqlarim yumilishiga yo‘l qo‘ymayman. Egamiz uchun bir joy topmagunimcha, Yoqubning qudratli Xudosi uchun Bir maskan bo‘lmaguncha hech dam olmayman.”

⁶Ahd sandig‘i Efratda [1], deb eshitgandik, Biz uni Yor [2] dalalarida topib oldik.

⁷“Egamizning maskaniga boraylik, Uning poyiga sajda qilaylik”, dedik.

⁸Qani, kel, ey Egam, oromgohingga Qudrating ramzi bo‘lgan sandiq bilan birga.

⁹Ruhoniylaring solihlikni kiysinlar, Taqvodorlaring shodlikdan kuylasinlar!

¹⁰O‘z quling Dovudning haqi–hurmati, Tanlagan shohingni rad qilmagin.

¹¹Ey Egam, Sen Dovudga ont ichgan eding, Sen shu ontingdan aslo qaytmay deysan: “O‘zingdan bino bo‘lgan o‘g‘illaringdan Birini sening taxtingga o‘tqazaman.

¹²Agar o‘g‘illaring Mening ahdimga rioya qilsa, Ularga o‘rgatgan amrlarimga itoat etsa, Ularning o‘g‘illari ham Shoh bo‘lib to abad sening taxtingda o‘tiradi.”

¹³Ey Egam, Sen Quddusni [3] tanlagansan, U yerni O‘zingga maskan qilishni istagansan.

¹⁴Sen shunday deding: “Men to abad yashaydigan joy shu joydir, Bu yerda istiqomat qilishni istaganman.

¹⁵Uning ozuqalariga mo‘l qilib baraka beraman, U yerdagi faqirlarni to‘ydiraman.

¹⁶Ruhoniylarni najotga burkayman, Taqvodorlari shodlikdan kuylaydilar!

¹⁷Dovudning naslini bu yerda ko‘kartiraman, O‘zim tanlagan shohning chirog‘ini o‘chirmayman.

¹⁸Uning g‘animlarini sharmandalikka o‘rayman, Shohning boshidagi toji esa porlab turaveradi.”