Read O‘zbek tilidagi Muqaddas Kitob, 2013 Zabur 134 Bible Online

Zabur 134 - O‘zbek tilidagi Muqaddas Kitob, 2013 bible

Zabur 134

¹Egamizga hamdu sanolar bo‘lsin! Egamizning nomiga madhiyalar bo‘lsin! Hamdu sano ayting, ey Egamizning qullari,

²Ey Egamizning uyida xizmat qiladiganlar, Ey Egamiz uyining hovlisida xizmat qiladiganlar!

³Egamizga hamdu sanolar bo‘lsin, U yaxshidir! Tarannum eting Uni, bu [1] yoqimlidir.

⁴Egamiz O‘zi uchun Yoqub naslini tanladi. Ha, O‘zimning xazinam, deb Isroil xalqini tanladi.

⁵Ha, bilaman, Egamiz ulug‘dir, Rabbimiz barcha xudolardan yuksakdir.

⁶Osmonda ham, zaminda ham, Dengizlarda, jamiki tubsiz suvlarda Egamiz istaganini qiladi.

⁷U yerning to‘rt tomonidan bulutlarni olib keladi, Yomg‘ir bilan birga chaqmoq yuboradi, Omborlaridan shamol olib keladi.

⁸Egamiz Misrning to‘ng‘ichlarini, Inson hamda hayvonlarning birinchi tug‘ilganini urdi [2].

⁹Fir’avn va uning hamma a’yonlariga qarshi Misrning orasiga Egamiz alomatu mo‘jizalarni yubordi [3].

¹⁰U ko‘p ellar, xalqlarni qirgan, Qudratli shohlarni bo‘g‘izlagan.

¹¹Amor xalqining shohi Sixo‘nni, Bashan shohi O‘gni, Hamda Kan’onning barcha shohlarini qirgan [4].

¹²Ularning yerini Isroil xalqiga mulk qilib berdi.

¹³Egamizning nomi to abad davom etar, Egamizning shuhrati nasllar osha davom etar.

¹⁴Egamiz O‘z xalqiga adolat qiladi, O‘z qullariga rahm–shafqat qiladi.

¹⁵Xalqlarning xudolari esa kumush, oltindan, Inson qo‘llarining mahsullaridir.

¹⁶Butlarning og‘izlari bor, so‘zlay olmaslar, Ko‘zlari bor, ko‘ra olmaslar.

¹⁷Quloqlari bor ularning, eshita olmas, Ular aslo nafas ololmas.

¹⁸Butlarni barpo qilganlar, butlarga ishonganlar Xuddi ularga o‘xshagan bo‘lib qolar.

¹⁹Ey Isroil xalqi, olqishlar ayting Egamizga! Ey Horun xonadoni [5], madhiyalar ayting Egamizga!

²⁰Ey Levi xonadoni [6], olqishlar ayting Egamizga! Ey Egamizdan qo‘rqqanlar, madhiyalar ayting Unga!

²¹Quddusda istiqomat qiladigan Egamizga Sionda olqishlar ayting! Egamizga hamdu sanolar bo‘lsin!