Read O‘zbek tilidagi Muqaddas Kitob, 2013 Zabur 139 Bible Online

Zabur 139 - O‘zbek tilidagi Muqaddas Kitob, 2013 bible

Zabur 139

¹Ijrochilar rahbariga. Dovud sanosi.

²Yomonlardan meni qutqar, ey Egam, Zo‘ravonlardan himoya qil meni.

³Ular yuraklarida qabihlikni qasd qiladi, Doimo urush–janjallarni qo‘zg‘aydi.

⁴Ular tillarini ilonday o‘tkir qiladi, Tillaridan ilon zahri tomadi.

⁵Ey Egam, meni qabihlarning qo‘lidan qutqar, Yiqitmoqchi bo‘lgan zo‘ravonlardan meni himoya qil.

⁶Takabburlar men uchun tuzoq qo‘yganlar, Ular to‘rlarining iplarini yoyganlar, Yo‘lim bo‘ylab menga qopqon qo‘yganlar.

⁷Ey Egam, Senga aytaman: “Sen Mening Xudoyimsan.” Quloq sol, ey Egam, Senga iltijo qilaman.

⁸Ey Egam Rabbiy, qudratli najotkorim! Jang kunida boshimni omon saqlading.

⁹Ey Egam, fosiqning istagini bajo qilmagin, Ularning qabih rejalariga omad bermagin, Ular mag‘rurlanib ketmasin.

¹⁰Atrofimni o‘rab olganlarning tahdidlari, O‘zlarining boshiga kelsin.

¹¹Yonayotgan ko‘mir cho‘g‘i o‘zlariga yog‘ilsin, Ular olovga, iflos chuqurlarga uloqtirilsin, Aslo qaytib chiqmasin.

¹²Tuhmatchilarga yurtda aslo joy bo‘lmasin, ko‘karmasin, Falokat zolimning izidan tushib, uni yo‘q qilsin.

¹³Bilaman, ey Egam, mazlumni himoya qilasan, Bechoraholni adolat ila qo‘llab–quvvatlaysan.

¹⁴Solihlar albatta Senga shukrona aytadi, To‘g‘ri insonlar huzuringda istiqomat qiladi.