Read O‘zbek tilidagi Muqaddas Kitob, 2013 Zabur 140 Bible Online

Zabur 140 - O‘zbek tilidagi Muqaddas Kitob, 2013 bible

Zabur 140

¹Dovud sanosi. [1] Senga yolvoraman, ey Egam, yonimga tez kelgin, Senga yolvorganimda ovozimga quloq solgin.

²Ibodatimni tutatqi nazriday qabul qilgin, Qo‘llarimni ko‘targanimni kechki qurbonlik deb bilgin.

³Ey Egam, og‘zimga posbon qo‘ygin, Lablarim eshigini qo‘riqlagin.

⁴Yuragimni qabihlikka burmagin, Yomon ishlarga qo‘shilishimga yo‘l qo‘ymagin, Badkirdorlarning jamoasida Ziyofatlarini yeyishimga yo‘l qo‘ymagin.

⁵Mayli, solih odam meni uraversin, Sodiq odam meni to‘g‘rilasin, Boshim shunday a’lo moyni rad qilmasin. Mening ibodatim muttasil Badkirdorlarning qabih ishlariga qarshidir.

⁶Ularning hakamlari qoyadan uloqtiriladi, Shunda fosiqlar so‘zlarim haq ekanligini bilib olishadi.

⁷Badkirdorlar aytar: “Shudgor qilinib, parchalangan yerday, Suyaklarimiz qabr [1] og‘zida maydalanib, sochilib yotibdi.”

⁸Ko‘zlarim Sendadir, ey Egam Rabbiy, Sendan panoh izlayman, Meni tashlab qo‘ymagin.

⁹Badkirdorlarning qopqonlaridan, Ular qo‘ygan tuzoqdan meni saqlagin.

¹⁰Men sog‘–omon o‘tib ketayin, Fosiqlar o‘zlari qo‘ygan to‘rga tushsin.