Read O‘zbek tilidagi Muqaddas Kitob, 2013 Zabur 143 Bible Online

Zabur 143 - O‘zbek tilidagi Muqaddas Kitob, 2013 bible

Zabur 143

¹Dovud sanosi. [1] Egamga, suyangan qoyamga olqishlar bo‘lsin, U qo‘llarimni urushga, barmoqlarimni jangga o‘rgatgan.

²Egam mening suyangan qoyamdir, qal’amdir, U qo‘rg‘onim, xaloskorimdir. Ha, Egam mening qalqonim, Unda men panoh topaman, Xalqlarni [1] U menga bo‘ysundiradi.

³Ey Egam, inson zoti kimdirki, unga e’tibor bersang! Bandalar [2] kimdirki, ular haqda o‘ylasang!

⁴Inson umri og‘izdan chiqqan nafasga o‘xshar, Odamzodning hayoti o‘tkinchi soyaga o‘xshar.

⁵Ey Egam, ko‘klarni yorib, pastga tushgin, Tog‘larga tekkin, ulardan tutun chiqsin.

⁶Chaqmoq chaqtir, yovlarni tirqiratgin, O‘qlaringni ot, ularni sarosimaga solgin.

⁷Yuqoridan uzat qo‘lingni, meni qutqargin, Azim suvlardan meni chiqarib olgin, Begonalar qo‘lidan meni qutqargin.

⁸Ularning so‘zlari behuda, Qo‘lini ko‘tarib, ular yolg‘on qasam ichadi.

⁹Ey Xudo, Senga yangi qo‘shiq kuylayman, O‘n torli arfa chalib Seni tarannum etaman.

¹⁰Shohlarga Sen zafar ato etasan, Quling Dovudni shafqatsiz qilichdan qutqarasan.

¹¹Kelgindilarning qo‘lidan Meni xalos qil, qutqargin. Ularning so‘zlari behuda, Qo‘lini ko‘tarib, ular yolg‘on qasam ichadi.

¹²O‘g‘illarimiz yoshligida yaxshi o‘sgan ko‘chatga o‘xshasin, Qizlarimiz saroyning o‘ymakor ustunlariga o‘xshasin.

¹³Omborlarimiz noz–ne’matlarga to‘lib–toshsin, Qo‘ylarimiz minglab, o‘n minglab yaylovlarda ko‘paysin.

¹⁴Ho‘kizimiz og‘ir yuklarni tortsin [3], Devorlarimiz darz ketmasin, Odamlarimiz surgun bo‘lmasin, Ko‘chalarimizda oh–voh, g‘amu kulfat bo‘lmasin.

¹⁵Naqadar baxtlidir bunday insonlar! Baxtlidir Xudoni Egamiz deb bilgan xalq!