Read O‘zbek tilidagi Muqaddas Kitob, 2013 Zabur 144 Bible Online

Zabur 144 - O‘zbek tilidagi Muqaddas Kitob, 2013 bible

Zabur 144

¹Dovudning hamdu sanosi. [1] [1]Ey Xudoyim, Shohim! Seni ulug‘layman! To abad Sening nomingni olqishlayman!

²Har kun Seni olqishlayman, Senga to abad hamdu sano aytaman.

³Egamiz buyukdir, madh etilsin yanada, Aql yetmas Uning buyukligiga.

⁴Ey Egam, bir nasl boshqasiga maqtar ishlaringni, Ular e’lon qilar qudratli ishlaringni.

⁵Ular shonli dabdabangni, ulug‘vorligingni so‘ylaydilar, Men esa ajoyib mo‘jizalaring haqida o‘ylayman [2].

⁶Odamlar qo‘rqinchli ishlaring qudrati haqida aytadilar, Men esa buyukligingni e’lon qilgayman.

⁷Insonlar cheksiz ezguligingni xotirlab, gapiraveradilar. Adolatingni ular sevinch ila kuylaydilar.

⁸Egamiz inoyatli, rahmdildir, Jahli tez chiqmaydi, sodiq sevgisi mo‘ldir.

⁹Egamiz har kimsaga himmat qilar, Yaratganlarining har biriga shafqat aylar.

¹⁰Ey Egam, jamiki yaratganlaring Senga shukr aytar, Jamiki taqvodorlaring Senga olqishlar kuylar.

¹¹Saltanating shuhratini ular hikoya qilar, Sening qudrating haqida ular so‘ylab yurar.

¹²Hammani qudratli ishlaringdan, Saltanating shuhratiyu dabdabasidan xabardor qilar.

¹³Sening saltanating abadiy shohlikdir, Hukmronliging nasllar osha davom etar [3].

¹⁴Yiqilayotganlarga Egamiz tayanch bo‘ladi, Ikki bukilganlarning qaddini rostlaydi.

¹⁵Ey Egam, hammaning ko‘zi umid bilan Senga tikilar, O‘z paytida ularning rizqini berasan.

¹⁶Sen qo‘lingni ochib, Jamiki jonzotning istagini qondirasan.

¹⁷Egamiz hamma yo‘llarida adolat qilar, Hamma ishlarida sevgisini ko‘rsatar.

¹⁸Egamiz O‘ziga yolvorganlarning yonidadir, Chin dildan yolvorganlarning yonidadir.

¹⁹O‘zidan qo‘rqqanlarning tilagini Egamiz qondirar, Ularning nolasini eshitib, ularga najot berar.

²⁰Egamiz O‘zini sevguchilarni asraydi, Hamma fosiqlarni qirib tashlaydi.

²¹Egamizning hamdu sanosi doimo tilimda bo‘ladi, Jamiki jonzot Uning muqaddas nomini to abad olqishlaydi.