Read O‘zbek tilidagi Muqaddas Kitob, 2013 Zabur 146 Bible Online

Zabur 146 - O‘zbek tilidagi Muqaddas Kitob, 2013 bible

Zabur 146

¹Egamizga hamdu sanolar bo‘lsin! Naqadar yaxshidir Xudoyimizni tarannum etmoq! Naqadar lazzatli, munosib Unga hamdu sano aytmoq!

²Egamiz Quddusni qaytadan quradi, Surgundagilarni Isroilga yig‘adi.

³Ezilgan ko‘ngillarga U shifo beradi, Ularning yaralariga malham qo‘yadi.

⁴Yulduzlarning sonini U aniqlab chiqadi, Ularning hammasiga nom beradi.

⁵Rabbimiz buyukdir, quvvati ko‘pdir, Uning donoligi cheksizdir.

⁶Egamiz mazlumlarni yuksaltiradi, Fosiqlarni esa yerga urib ezadi.

⁷Egamizga shukrona aytib tarannum qiling, Xudoyimizga atab lirada kuy chaling.

⁸U samolarni bulutlar ila qoplaydi, U yerni yomg‘ir bilan ta’minlaydi, Qir–adirlarda o‘t–o‘lan o‘stiradi.

⁹U hayvonlarning rizq–ro‘zini beradi, Qarg‘a bolalari qag‘illaganda ularga oziq beradi.

¹⁰U otlarning kuchidan zavq olmaydi, Sipohning kuchli oyoqlaridan xushlanmaydi.

¹¹Egamiz O‘zidan qo‘rqqanlardan xushlanadi, Uning sodiq sevgisiga umid qilganlardan mamnun bo‘ladi.