Read O‘zbek tilidagi Muqaddas Kitob, 2013 Zabur 148 Bible Online

Zabur 148 - O‘zbek tilidagi Muqaddas Kitob, 2013 bible

Zabur 148

¹Egamizga hamdu sanolar bo‘lsin! Egamizga hamdu sanolar bo‘lsin samolardan, Unga hamdu sanolar bo‘lsin falaklardan!

²Ey Uning farishtalari, Egamizga hamdu sanolar bo‘lsin! Ey Uning samoviy lashkarlari, Egamizga hamdu sanolar bo‘lsin!

³Unga hamdu sanolar bo‘lsin, ey quyosh, ey oy, Hamdu sanolar bo‘lsin Unga, nurli yulduzlar!

⁴Hamdu sanolar bo‘lsin Unga, ey falaklar toqi, Ey samolar uzra joylashgan suvlar! [1]

⁵Egamizga hamdu sano aytsin ular, Egamizning amri bilan yaratilgan ular.

⁶Egamiz bir farmon bilan ularni to abad joyiga o‘rnashtirdi, Bu farmon bekor qilinmaydi.

⁷Yer yuzidan Egamizga hamdu sanolar bo‘lsin! Ey jamiki tubsiz suvlar, dengiz maxluqlari,

⁸Ey chaqmoq, qor, do‘l, bulutlar, Uning amriga bo‘ysunuvchi bo‘ronlar Egamizga hamdu sanolar ayting!

⁹Madhiyalar ayting Unga, ey tog‘lar, jamiki qirlar, Mevali daraxtlar, jamiki sadr daraxtlari!

¹⁰Hamdu sano ayting Unga, Ey yovvoyi hayvonlar, jamiki chorva, Sudralib yuruvchilaru uchar qushlar!

¹¹Madhiyalar ayting Unga, Ey zamindagi shohlar, jamiki xalqlar, Shahzodalar, zamindagi hamma hukmdorlar!

¹²Unga hamdu sano ayting yigitlar, qizlar, Yoshu qari — hammangiz birga.

¹³Hammasi Egamizga hamdu sano aytsin, Faqatgina Uning nomi buyukdir, Shuhrati zaminu osmondan balanddir.

¹⁴Egamiz O‘z xalqini qudratli qildi [2]. Taqvodorlari — qadrdoni Isroil xalqi Unga hamdu sano aytishlariga sabab berdi. Egamizga hamdu sanolar bo‘lsin!