Read O‘zbek tilidagi Muqaddas Kitob, 2013 Zabur 16 Bible Online

Zabur 16 - O‘zbek tilidagi Muqaddas Kitob, 2013 bible

Zabur 16

¹Dovud ibodati. [1] Ey Egam, haqli da’voimni eshit, Faryodimga e’tibor ber. Hiylasiz og‘zimdan chiqqan Ibodatimga quloq tut.

²Begunohligimni ko‘rsatgin Sen, Adolatni ko‘rsin ko‘zlaring.

³Hatto yuragimni taftish qilib, Tunda meni sinab ko‘rsang, Agar meni imtihon qilsang, Yomon niyatni menda topa olmasding. Og‘zim gunoh qilmas, qarorim shudir.

⁴Insonlar qilmishini men qilmadim, Sening amringga men itoat etdim, Zo‘ravonning yo‘llaridan o‘zimni saqladim.

⁵Qadamlarim so‘qmoqlaringda sobit bo‘ldi, Oyoqlarim hech qachon toyib ketmadi.

⁶Senga iltijo qilaman, ey Xudo, javob berasan, Menga quloq tutib, so‘zlarimni eshitgin.

⁷Sodiqligingni zohir et ajoyib ishlar ila. Raqiblardan qochib Senga borganlarga O‘ng qo‘ling bilan najot berguvchi Sensan.

⁸Meni ko‘zlaring qorachig‘iday asragin, Meni qanotlaring soyasida yashirgin,

⁹Meni talaydigan fosiqlardan asragin, Atrofimda shay turgan ashaddiy yovlarimdan yashirgin.

¹⁰Ularning yuragida shafqatga joy yo‘q, Og‘izlari bilan kiborlarcha gapiradi.

¹¹Ular meni ta’qib qilib, o‘rab olganlar, Yerga urmoq uchun menga ko‘zlarini tikadi.

¹²Dushmanlarim meni g‘ajimoqchi bo‘lgan sherga o‘xshaydi, Pana joyda pisib yotgan shervachchaga o‘xshaydi.

¹³Kel, ey Egam! Ularga qarshi yuz bur, Tiz cho‘ktirgin ularni! Qiliching ila fosiqlardan qutqargin meni!

¹⁴Ey Egam! Qudrating ila Meni bunday insonlardan qutqargin, Ularning nasibasi faqatgina bu dunyodadir. Tayyorlab qo‘ygan achchiq ko‘rgiliklaring bilan Ularni to‘ydirgin, Hatto bolalariga ham yetsin, Nabiralari ham totib ko‘rsin.

¹⁵Solih bo‘lganim uchun men Seni ko‘rgayman, Uyg‘onib, jamolingni ko‘rganimdan rozi bo‘lgayman.