Read O‘zbek tilidagi Muqaddas Kitob, 2013 Zabur 18 Bible Online

Zabur 18 - O‘zbek tilidagi Muqaddas Kitob, 2013 bible

Zabur 18

¹Ijrochilar rahbariga. Dovud sanosi.

²Xudoning shuhratini samolar namoyon qiladi, Uning ijodini falak toqi aytib turadi.

³Osmon kundan–kunga buni bildiradi, Har tun bundan xabardor qiladi.

⁴Samo, falak aytmas bir gap, yo bir jumla, Chiqmas ulardan hech bir sado.

⁵Ammo xabarlari [1] har tomonga tarqaladi, Olamning chetigacha yetib boradi. Xudo samolarda quyosh uchun chodir qurgan.

⁶Quyosh go‘shangadan chiqqan kuyovga o‘xshaydi. Qahramonlarga o‘xshab g‘ayrat bilan yo‘lagidan boradi.

⁷Samolarning bir chetidan u chiqib, Aylanib, boshqa bir chetiga yo‘l oladi, Uning taftidan hech narsa yashirina olmaydi.

⁸Egamizning qonuni mukammaldir, Bizga u yangi kuch ato etadi, Egamizning farmonlari ishonchlidir, G‘o‘r yoshlarga donolik beradi.

⁹Egamizning buyruqlari to‘g‘ridir, Qalblarni shodlikka to‘ldiradi, Egamizning amrlari ravshandir, Ular ko‘zlarga nur beradi.

¹⁰Egamizdan qo‘rqish poklikdir, Bu to abad davom etadi. Egamizning qoidalari haqiqatdir, Hammasi g‘oyat adolatlidir.

¹¹Ular sof oltindan ham a’lodir, Toza asaldan ham shirinroqdir.

¹²Ey Egam, qoidalaring menga, O‘z qulingga o‘git beradi, Qoidalaringga itoat etganlar buyuk mukofot oladi.

¹³Kim o‘z xatosini bila oladi?! Yashirin xatolardan meni o‘zing poklagin.

¹⁴Men, O‘z qulingni oshkora gunohdan saqlagin, Ustimdan gunoh hokim bo‘lmasin. Shunda men aybsiz bo‘laman, Og‘ir gunohdan ham xoli bo‘laman.

¹⁵Ey Egam, suyangan qoyam, qutqaruvchim! Og‘zimdan chiqqan so‘zlar, Yurakdagi niyatlarim Senga ma’qul bo‘lsin.