Read O‘zbek tilidagi Muqaddas Kitob, 2013 Zabur 2 Bible Online

Zabur 2 - O‘zbek tilidagi Muqaddas Kitob, 2013 bible

Zabur 2

¹Nega quturadi xalqlar?! Nega behuda fitna qiladi elatlar?!

²Zamin shohlari Egamizga, Va U tanlagan shohga qarshi saf tortadilar. Hukmdorlar fitna qo‘zg‘ab, shunday deydilar:

³“Sindiraylik ular solgan kishanlarni, Olib tashlaylik bo‘ynimizdan sirtmoqlarni.”

⁴Osmonda hukmron bo‘lgan Rabbiy esa Ularni masxaralab, ustidan kuladi.

⁵Rabbiy g‘azab bilan ularni ogoh etadi, Qahrini sochib, vahimaga solib aytadi:

⁶“Men Sionga [1], O‘zimning muqaddas tepaligimga O‘zimning shohimni joylashtirdim.”

⁷Egamizning so‘zlarini shoh e’lon qilmoqda: “Egamiz menga shunday dedi: ‘Sen Mening o‘g‘limsan, Bugun Men senga Ota bo‘ldim [2].

⁸Tila, xalqlarni senga mulk qilib beraman, Yerning to‘rt tomoni seniki bo‘ladi.

⁹Temir xivchin ila ularni urib ezasan [3], Sopol ko‘zani sindirganday ularni parchalaysan.’”

¹⁰Ey shohlar! Endi aql bilan ish qiling. Ey zamin hukmdorlari! Ogoh bo‘ling.

¹¹Qo‘rquv ila Egamizga sajda qiling! Vahima ila tavba qiling! [4]

¹²Uning o‘g‘liga [5] ta’zim qiling, Bo‘lmasa U g‘azablanadi, Yo‘lingizda yo‘q bo‘lib ketasiz, Uning g‘azabi tez alanga oladi. Naqadar baxtlidir Unda panoh topganlar!