Read O‘zbek tilidagi Muqaddas Kitob, 2013 Zabur 20 Bible Online

Zabur 20 - O‘zbek tilidagi Muqaddas Kitob, 2013 bible

Zabur 20

¹Ijrochilar rahbariga. Dovud sanosi.

²Ey Egam! Sening qudrating tufayli shoh quvonadi, Sen bergan zafarlardan u naqadar lazzatlanar!

³Ko‘nglidagi istaklarini ro‘yobga chiqarding, Uning tilaklarini rad qilmading.

⁴Ulug‘ barakani unga ato qilding, Uning boshiga sof oltin toj kiygizding.

⁵Sendan umr so‘raganda, umr berding, Uzoq hamda boqiy umr baxsh etding.

⁶Shohning shuhrati Sen bergan zafarlar tufayli ulug‘dir, Unga dabdaba, ulug‘vorlik ato qilgan Sensan.

⁷Sen to abad unga baraka berasan, Unga juda yaqin bo‘lib, Uni shodlikka to‘ldirasan.

⁸Egamizga shohimiz umid bog‘laydi, Xudoyi Taoloning sodiq sevgisi tufayli U hech qachon qoqilmaydi.

⁹Ey shohimiz, qo‘ling barcha dushmanlaringni mag‘lub qiladi, Ha, o‘ng qo‘ling sendan nafratlanganlarni mag‘lub qiladi.

¹⁰Sen zohir bo‘lganing zamon Qizigan tandirday ularni yondirasan. Egamiz O‘z g‘azabi bilan ularni yutib yuboradi, Alanga ularni yondirib tashlaydi.

¹¹Ey shohimiz, ularning naslini Yer yuzidan qirib tashlaysan, Zurriyotini insoniyat orasidan yo‘qotasan.

¹²Dushmanlaring senga qarshi yomonlikni reja qilsalar, Ular senga qarshi fitna qo‘zg‘asalar, Hech narsaga erisha olmaydilar.

¹³Kamoningdan ularga o‘qlar otasan, Ortiga qochishga majbur qilasan.

¹⁴O‘z qudrating tufayli yuksalaver, ey Egam, Qudratingni kuylab, hamdu sano aytamiz.