Read O‘zbek tilidagi Muqaddas Kitob, 2013 Zabur 21 Bible Online

Zabur 21 - O‘zbek tilidagi Muqaddas Kitob, 2013 bible

Zabur 21

¹Ijrochilar rahbariga. “Tongda chiqqan kiyik” kuyiga aytilgan. Dovud sanosi.

²Ey Xudoyim! Nega meni tark etding?! Nega mendan uzoqdasan shu qadar?! Ey Xudoyim! Nechun menga najot bermaysan?! Ohu nolalarimni eshitmaysan?!

³Ey Xudoyim, kun bo‘yi iltijo qilaman, Sen esa javob bermaysan. Tun bo‘yi yolvoraman, Ammo menga tinchlik yo‘q.

⁴Baribir Sen muqaddas Xudosan, Isroilning hamdu sanosi qurshab olgan taxtingni.

⁵Ota–bobolarimning umidi Senda edi, Sen ularga najot berding.

⁶Ular Senga nola qilib, najot topdilar, Ular Senga ishonib, uyalib qolmadilar.

⁷Axir, men inson emas, bir qurtdirman. Odamlar hazar qilgan, xalqlar nafratlangan.

⁸Meni ko‘rgan har kim ustimdan kular, Meni haqoratlab, bosh chayqab derlar:

⁹“Egangga ishon, O‘zi qutqarib olar, Egang sendan mamnun bo‘lsa, U najot berar.”

¹⁰Sen eding onam qornidan meni chiqargan, Sen eding onam bag‘rida meni omon saqlagan.

¹¹Senga tayanaman tug‘ilganimdan buyon, Mening Xudoyimsan onam dunyoga keltirgandan buyon.

¹²Mendan uzoq bo‘lmagin! Axir, kulfat yonginamda–ku, Menga madad berguvchi biron kimsa yo‘q!

¹³Bir gala buqalar [1] Meni qurshab olgan, Ha, Bashan yerlarining [2] kuchli buqalari Meni o‘rab olgan.

¹⁴O‘kirib o‘ljasini pora qiladigan sherga o‘xshab, Men tomon ular og‘izlarini katta ochgan.

¹⁵Hayotim suv kabi to‘kildi, Suyaklarim bo‘g‘inidan bo‘shashdi, Yuragim mum kabi ichimda erib ketdi.

¹⁶Madorim sopol parchasiday quridi, Tilim tanglayimga yopishib qoldi, Meni o‘lim to‘shagiga yotqizding.

¹⁷Atrofimda ko‘ppaklar izg‘iydi, Badkirdorlar to‘dasi qurshab olgandir, Qo‘lu oyoqlarimni ilma–teshik qiladi [3].

¹⁸Hamma suyaklarim ko‘rinib turadi, Dushmanlarim ko‘zlarini chaqchaytirib, Yeb qo‘ygudek bo‘ladi.

¹⁹Kiyimlarimni o‘zaro ular bo‘lishgan, Libosim uchun qur’a tashlashgan.

²⁰Mendan uzoq turma, ey Egam! Kuchim manbayi Sensan! Tez kel, yordam ber!

²¹Jonimni qilich damidan qutqar, Hayotimni ko‘ppaklar changalidan qutqar!

²²Sherlar og‘zidan qutqargin meni! Yovvoyi buqalar shoxidan asragin meni! Sen iltijoimga javob berding.

²³Birodarlarimga Sen haqingda aytaman, Jamoa orasida Senga hamdu sano o‘qiyman.

²⁴Ularga shunday deyman: “Egamizga hamdu sano ayting, ey Undan qo‘rqqanlar! Egamizni ulug‘lang, ey Yoqub nasli! Egamizni izzatlang, ey Isroil nasli!

²⁵Kulfatda qolganning qayg‘ularidan Egamiz nafratlanmagan yo hazar qilmagan. Balki undan yuz o‘girmasdan, Nola qilganda, Egamiz eshitgan.”

²⁶Ulug‘ jamoa ichra Hamdu sano aytishimning sababi Sensan. Sendan qo‘rqqanlar oldida ontimni ado etaman.

²⁷Ey Egam, qashshoqlar yeb to‘yadilar [4], Senga yuz burganlar Seni madh qiladilar, Ular dunyo turguncha tursinlar!

²⁸Egamizni eslab, Unga yuz bursinlar Yer yuzidagi jamiki insonlar! Jamiki urug‘u elatlar Unga sajda qilsinlar!

²⁹Egamiz hokimi mutlaqdir, Elatlar ustidan U hukmrondir.

³⁰Jamiki boylar ham ziyofat yeb, unga ta’zim qiladi. Tuproq ostiga ketayotganlar ham Unga sajda qiladi, Hatto o‘z hayotini saqlay olmaydiganlar ta’zim qiladi.

³¹Avlodlar Unga xizmat qiladi, Kelgusi nasllar Rabbiy haqida eshitadi.

³²Ular kelib Egamizning najoti haqida e’lon qiladi, Uning qilganlarini hali tug‘ilmagan xalqlarga aytadi.