Read O‘zbek tilidagi Muqaddas Kitob, 2013 Zabur 24 Bible Online

Zabur 24 - O‘zbek tilidagi Muqaddas Kitob, 2013 bible

Zabur 24

¹Dovud sanosi. [1] [1]Yuragimni ochaman Senga, ey Egam!

²Senga umid bog‘layman, ey Xudoyim! Sharmanda bo‘lishimga yo‘l qo‘ymagin, Dushmanlarim mendan ustun kelmasin.

³Senga ishonganlar aslo bo‘lmasin sharmanda. Sharmandalik kelsin Senga asossiz xiyonat qilganlarning boshiga.

⁴Ey Egam, yo‘llaringni menga ko‘rsat, So‘qmoqlaringni menga o‘rgat.

⁵Haqiqating yo‘lidan meni boshlab o‘rgatgin, Najotkorim Xudo O‘zingsan, Kun bo‘yi Sendan umid qilaman.

⁶Yodingda tut, ey Egam, buyuk shafqatingni Ham sevgida sodiqligingni. Axir, azaldan Sen shunday qilgansan.

⁷Esga olma yoshlikdagi gunohlarimni Hamda qilgan itoatsizliklarimni. Sodiq sevging haqi yodga ol meni, Axir, Sen yaxshisan, ey Egam!

⁸Egamiz yaxshi, adolatlidir! U gunohkorlarga yo‘l–yo‘riq ko‘rsatadi.

⁹U kamtarni to‘g‘rilikka boshlaydi, Kamtarin insonni O‘z yo‘liga o‘rgatadi.

¹⁰Egamiz qilgan har ishi orqali Uning ahdiga rioya qilganlarga Sodiq sevgisini ko‘rsatadi.

¹¹Mening ayblarim ko‘p. Ey Egam, O‘z noming haqi Ayblarimni kechirgin.

¹²Agarda inson Egamizdan qo‘rqsa, U tanlaydigan yo‘lni Egamiz o‘rgatadi.

¹³O‘sha inson umrini farovonlikda o‘tkazadi, Uning nasli yurtni mulk qilib oladi.

¹⁴Egamiz Undan qo‘rqadiganlarga O‘z niyatlarini ishonib bildiradi, O‘z ahdini ularga ma’lum qiladi.

¹⁵Nigohim doimo Egam tomondadir, U oyoqlarimni tuzoqdan xalos qiladi.

¹⁶Ey Egam, holimga boq, mehribonlik qil. Men yolg‘izman, tushkunlikka tushganman.

¹⁷Yurakdagi g‘amlarim ortib bormoqda, Shu kulfatdan meni qutqargin.

¹⁸Kulfatu g‘amlarimni ko‘rib, Barcha gunohlarimdan o‘tgin.

¹⁹Qara, dushmanlarim naqadar ko‘p, Mendan qattiq nafrat qilarlar.

²⁰Hayotimni asra, qutqargin meni, Sharmandali ahvolga solmagin meni, Zotan, Senda panoh topaman men.

²¹Haqqoniylik, to‘g‘rilik saqlasin meni, Zotan, Sendan umid qilaman men.

²²Ey Xudo, qutqargin Isroilni Jamiki kulfatlaridan!