Read O‘zbek tilidagi Muqaddas Kitob, 2013 Zabur 26 Bible Online

Zabur 26 - O‘zbek tilidagi Muqaddas Kitob, 2013 bible

Zabur 26

¹Dovud sanosi. [1] Egam nurim va najotimdir, Kimdan men qo‘rqardim?! Egam hayotimning qal’asidir, Kim meni qo‘rqita olar?!

²Tanasini g‘ajiylik, deb Yovuzlar mening ustimga bostirib kelganda, Ha, g‘animu dushmanlarim menga hujum qilganda, Qoqilib, yiqilib tushadilar.

³Hatto butun lashkar meni o‘rab olsa ham, Yuragimda aslo qo‘rquv paydo bo‘lmas. Hatto menga qarshi jangga otlansa ham, Ishonchim hech ham yo‘qolmas.

⁴Bir narsani Egamdan so‘raganman, Ha, Undan istaganim bitta narsadir: Egamning uyida to abad yashay, Egamning jamolini ko‘ray, Ma’badda turib, Unga muntazir bo‘lay.

⁵Kulfatda qolgan kunlarimda U meni O‘z chaylasida omon saqlaydi. Chodiri ostida meni yashiradi, Baland qoya tepasiga o‘tqazib qo‘yadi.

⁶Endi esa har tarafdagi g‘animlarim ustidan Boshim mag‘rur ko‘tarilgandir. Shodlikdan hayqirib, Egamning chodirida qurbonlik keltiraman. Egamni kuylab, qo‘shiq aytaman.

⁷Eshitgin, ey Egam, iltijo qilganimda, Shafqat qilgin, javob ber menga.

⁸“Menga intil!” deganingni qalbim eshitdi, Ha, ey Egam, men Senga intilaman.

⁹Yuzlaringni mendan yashirmagin, G‘azab ila men, O‘z qulingdan voz kechmagin, Madadkorim Sen bo‘lgansan–ku, ey Egam. Rad etma, tark aylama meni, ey najotkorim Xudo!

¹⁰Ota–onam meni tark etsa hatto, Ey Egam, Sen meni qabul qilasan.

¹¹Yo‘lingni menga ko‘rsat, ey Egam, Dushmanlarim poylab turgani uchun Meni to‘g‘ri so‘qmoqlaringdan yetakla.

¹²G‘animlarim qo‘llariga topshirma meni. Axir, soxta guvohlar, nohaq ayblovchilar Menga qarshi chiqdilar.

¹³Shubham yo‘q, tiriklar diyorida Egamning ezguligini albatta ko‘raman.

¹⁴Egamizga umid bog‘la, Dadil bo‘l, yuragingga dalda ber, Egamizga umid bog‘la!