Read O‘zbek tilidagi Muqaddas Kitob, 2013 Zabur 29 Bible Online

Zabur 29 - O‘zbek tilidagi Muqaddas Kitob, 2013 bible

Zabur 29

¹Dovud sanosi. Egamizning uyi bag‘ishlangan paytda aytilgan qo‘shiq.

²Ey Egam, Seni ulug‘layman! Qabr og‘zidan meni qutqarding, Dushmanlarim mening ustimdan kulishiga yo‘l qo‘ymading.

³Sendan madad so‘rab yolvordim, ey Egam Xudo, Menga Sen berding shifo.

⁴Ey Egam, o‘liklar diyoridan [1] jonimni olib chiqding, Qabrga kirayotganimda meni qutqarding.

⁵Ey Egamizning taqvodorlari! Egamizga hamdu sano kuylanglar, Uning muqaddas nomini olqishlang.

⁶Egamizning g‘azabi bir lahza davom etadi, Lutfu karami bir umr tugamasdir. Shu bois qayg‘u–alam tun bo‘yi davom etsa ham, Tong bilan birga shodlik ham kirib keladi.

⁷Ishlarim yurishganda, “Aslo qoqilmasman!” der edim.

⁸Ey Egam, lutfu karaming bilan Meni tog‘day mustahkam qilganding. Ammo yuzingni o‘girganingda, Men dahshatga tushdim.

⁹Ey Egam, men Senga iltijo qildim, Shafqat so‘rab, ey Rabbiy, Senga yolvordim:

¹⁰Agar men kirib ketsam qabrga, Mening o‘limimdan ne foyda Senga?! Tuproq Senga hamdu sano aytarmi?! [2] Sening sodiqligingni u so‘ylarmi?!

¹¹Eshit, ey Egam, menga rahm qilgin, Ey Egam, menga madadkor bo‘lgin!

¹²Azamni Sen to‘yga aylantirding, Aza libosini [3] egnimdan olib tashlading, Shodlikni menga kiygizding.

¹³Qalbim sukut saqlamay, Seni kuylab sano o‘qisin, Ey Egam Xudo, Senga to abad shukr aytaman.