Read O‘zbek tilidagi Muqaddas Kitob, 2013 Zabur 30 Bible Online

Zabur 30 - O‘zbek tilidagi Muqaddas Kitob, 2013 bible

Zabur 30

¹Ijrochilar rahbariga. Dovud sanosi.

²Ey Egam, Senda men panoh topaman, Sharmanda bo‘lishimga aslo yo‘l qo‘yma, Adolatlisan, meni qutqargin.

³Menga quloq tut, darrov qutqargin meni, Mening panoh qoyam bo‘lgin. Najot topay, mustahkam qo‘rg‘on bo‘lgin.

⁴Chindan ham Sen suyangan qoyamsan, qal’amsan, O‘z noming haqi meni yetakla, yo‘l ko‘rsatgin.

⁵Sen mening panohimsan. Qo‘yilgan tuzoqdan meni qutqargin.

⁶Hayotimni Senga topshiraman, ey Egam, Meni qutqarding, ey sodiq Xudo.

⁷Soxta xudolarni izzatlaganlarga Men nafratimni sochaman. Ey Egam, men Senga umid bog‘layman.

⁸Sodiq sevging ila shod–xurram bo‘lay, Qayg‘ularimni O‘zing ko‘rgansan, Jonim azobda qolganin bilasan.

⁹Meni g‘anim qo‘liga bermading, Oyoqlarimni bexavotir yerga qo‘yding.

¹⁰Rahm qil, ey Egam, kulfatda qoldim, Ko‘zlarim qayg‘udan toldi, Jonu tanam adoyi tamom bo‘ldi.

¹¹Hayotim azob bilan tugaydi, Yillarim oh–voh bilan bitadi. Gunohlarimdan [1] kuchim tugaydi, Suyaklarim qurib bitadi.

¹²Dushmanlarim meni haqorat qiladi, Qo‘shnilarim mendan hazar qiladi. Do‘stlarim ham mendan qo‘rqadi, Ko‘chada ko‘rib meni, qochib ketadi.

¹³Meni unutdilar, go‘yo o‘lganman, Go‘yo singan sopol idish kabiman.

¹⁴Eshityapman, ko‘pchilik g‘iybat qiladi, Atrofimni dahshat o‘rab olgan. Birgalikda menga qarshi fitna to‘qishadi, Meni o‘ldirmoqni niyat qilishadi.

¹⁵Ey Egam, men Senga umid bog‘layman, “Mening Xudoyim Sensan”, deb aytaman.

¹⁶Hayotim Sening qo‘lingdadir, G‘animlarim qo‘lidan, Payimga tushganlardan meni qutqargin.

¹⁷Jamoling men, qulingga nurlarini sochsin, Sen sodiqsan, meni qutqargin.

¹⁸Yo‘l qo‘yma, ey Egam, sharmanda bo‘lishimga, Madad so‘rab iltijo qildim Senga. Qabihlar sharmandayi sharmisor bo‘lsin, O‘liklar diyoriga [2] jim kirib borsin.

¹⁹O‘chsin ularning yolg‘onchi ovozlari, Zero, takabburlik ham nafrat bilan Ular solihga qarshi so‘ylar.

²⁰O, naqadar buyukdir Sening ezguliging! O‘zingdan qo‘rqqanlarga uni saqlab qo‘ygansan, Senda panoh topganlarga hadya qilasan, Hammaning ko‘z oldida in’om qilasan.

²¹Huzuringda ularni himoya qilasan, Inson fitnalaridan omon saqlaysan. Ularni O‘z chodiring ostida Ig‘volardan saqlab turasan.

²²Qamalda qolgan shaharday bo‘lganimda Menga ajoyib sadoqatingni ko‘rsatganing uchun Ey Egam, Senga olqishlar bo‘lsin!

²³Vahimaga tushib men: “Ey Egam, Sening nazaringdan mahrum bo‘ldim”, degandim. Ha, madad so‘rab Senga yolvorganimda Iltijolarimni eshitding.

²⁴Ey Egamizning taqvodorlari, Uni seving! O‘ziga sodiq bo‘lganlarni U himoya qiladi, Takabburlarga to‘liq jazo beradi.

²⁵Bardam bo‘ling, dadil bo‘lsin yuragingiz, Ey siz, Egamizdan umid qilganlar!