Read O‘zbek tilidagi Muqaddas Kitob, 2013 Zabur 32 Bible Online

Zabur 32 - O‘zbek tilidagi Muqaddas Kitob, 2013 bible

Zabur 32

¹Sevinch ila Egamizga qo‘shiq kuylang, ey solihlar! Unga hamdu sano aytmoq to‘g‘ri odamlarga munosibdir!

²Lira chalib, Egamizga hamdlar ayting, O‘n torli arfa chalib, Unga qo‘shiq kuylang.

³Egamizga yangi bir qo‘shiq ayting, Mahorat ila tor chalib, shodlikdan hayqiring.

⁴Egamizning kalomi haqiqatdir, Uning barcha ishlari ishonchlidir.

⁵Egamiz adolatu haqiqatni sevadi, Zamin Uning sodiq sevgisiga to‘la.

⁶Samolar bunyod bo‘lgan Egamizning kalomidan, Samodagi jismlar yaralgan Uning nafasidan.

⁷U dengiz suvlarini yig‘ib qo‘ygan, Tubsiz suvlarni go‘yo omborga joylab qo‘ygan [1].

⁸Butun yer yuzi Egamizdan qo‘rqsin, Butun olam ahli Undan hayiqsin.

⁹U gapirdi, aytgani mavjud bo‘ldi, Amr qildi, zamin yaratildi.

¹⁰Egamiz xalqlarning rejalarini parokanda qiladi, U xalqlarning niyatlarini puchga chiqaradi.

¹¹Egamizning rejalari to abad sobit turadi, Uning niyatlari nasldan–naslga o‘tib boradi.

¹²Egamizni o‘z Xudosi, deb bilgan xalq baxtlidir! O‘z mulkim, deb Egamiz tanlagan xalq baxtlidir!

¹³Egamiz samodan boqar, Inson zotini U ko‘rib turar.

¹⁴U taxt qurgan joyidan turib, Hamma yer yuzida yashovchilarni kuzatar.

¹⁵U hammaning yuragini yaratgan, Hammaning ishlarini anglagan.

¹⁶Lashkari ko‘pligidan shoh qutulmaydi, Kuchi ko‘pligidan jangchi g‘olib bo‘lavermaydi.

¹⁷“Jang otlari najot berar” deyish puch xayoldir, Ular qudratli kuchi bilan qutqara olmaydi.

¹⁸Egamiz ko‘rib turar O‘zidan qo‘rqqanlarni, Uning sodiq sevgisiga umid qilganlarni.

¹⁹Egamiz ularni o‘limdan qutqaradi, Ochlikdan saqlab, tirik qoldiradi.

²⁰Jonimiz Egamizga muntazirdir, U bizning madadkorimiz, qalqonimizdir.

²¹Biz muqaddas Xudoga umid bog‘laymiz, U tufayli yuragimiz shodlikka to‘la.

²²Ey Egam! Senga hamon umid bog‘laymiz, Sodiq sevging bizga yor bo‘lsin.