Read O‘zbek tilidagi Muqaddas Kitob, 2013 Zabur 33 Bible Online

Zabur 33 - O‘zbek tilidagi Muqaddas Kitob, 2013 bible

Zabur 33

¹Abumalek oldida o‘zini telbalikka solib, uning huzuridan quvilgan paytda Dovudning aytgan sanosi.

²[1]Har doim Egamni olqishlayman, Uning madhi tilimdan aslo tushmaydi.

³Egam bois jonim faxrlanadi, Mazlum eshitib, shod bo‘lsin.

⁴Men bilan birga ulug‘lang Egamni, Birgalikda sharaflaylik Uni.

⁵Egamga yuz burdim, U javob berdi, Hamma qo‘rquvlardan U xalos qildi.

⁶Egamizdan umid qilganlarning yuzlarida nur, Ularning yuzlari aslo shuvut bo‘lmaydi.

⁷Bu bechora iltijosin Egamiz eshitdi, Barcha uqubatlardan uni qutqardi.

⁸Egamizdan qo‘rqqanlarning atrofida Egamizning farishtasi qarorgoh qurib, Ularga najot baxsh etadi.

⁹Egamizning muruvvatini tatib ko‘r, Egamiz yaxshidir, bilib ol. Naqadar baxtlidir Unda panoh topganlar.

¹⁰Ey taqvodorlar, Egamizdan qo‘rqing. Undan qo‘rqqanlar aslo muhtojlik ko‘rmas.

¹¹Hatto yirtqich shervachchalar ovqatsiz, Ular ochlikdan azob chekadi. Egamizga yuz burganlardan esa Farovonlik ayrilmaydi.

¹²Keling, ey bolalar, tinglangiz meni, O‘rgatayin men Egamizdan qo‘rqishni.

¹³Hayotdan zavqlanishni, Baxtli uzoq umr ko‘rishni istaysizmi?

¹⁴Demak, tilingizni yomon so‘zlardan tiying, Og‘zingizni yolg‘on gaplardan asrang.

¹⁵Yomonlikdan qayting, yaxshilik qiling, Tinchlik istang, ha, tinchlik payida bo‘ling.

¹⁶Egamiz solihlarni kuzatib turadi, Ularning nolasini Egamiz eshitadi.

¹⁷Badkirdorlardan esa yuz o‘giradi, Ularning xotirasini yer yuzidan o‘chiradi.

¹⁸Taqvodorlar yolvoradi, Egamiz eshitadi, Barcha balolardan ularni Egamiz qutqaradi.

¹⁹Ko‘ngli cho‘kkanlarga Egamiz yaqindir, Ruhan ezilganlarni U qutqaradi.

²⁰Solihlarning qayg‘ulari ko‘p bo‘lsa, Hamma qayg‘ulardan Egamiz xalos qilar.

²¹Ularning o‘zini Egamiz saqlaydi, Bironta ham suyagi sindirilmaydi.

²²O‘z yovuzligi fosiqqa o‘lim keltiradi, Solihdan nafratlangan mahkum bo‘ladi.

²³Egamiz O‘z qullarining hayotini qutqaradi, Egamizda panoh topuvchilar mahkum bo‘lmaydi.