Read O‘zbek tilidagi Muqaddas Kitob, 2013 Zabur 34 Bible Online

Zabur 34 - O‘zbek tilidagi Muqaddas Kitob, 2013 bible

Zabur 34

¹Dovud sanosi. [1] Ey Egam, menga qarshi chiqqanlarga O‘zing qarshi bo‘l. Menga hujum qilganlar bilan O‘zing jang qil.

²Qalqonu sovutingni ol, Qani, menga yordamga kel.

³Meni ta’qib qilganlarga qarshi Nayzayu boltangni olgin. “Senga najot beraman”, deb O‘zing menga va’da bergin.

⁴Mening jonimga qasd qilganlar Sharmandayu sharmisor bo‘lsin! Menga qarshi fitna qilayotganlar Uyatga qolib, orqaga qaytsin!

⁵Xuddi shamolda uchgan somon singari, Ey Egam, Sening farishtang ularni quvsin.

⁶Qorong‘u sirpanchiq bo‘lsin ularning yo‘li, Ey Egam, Sening farishtang ularni quvsin.

⁷Sababsiz menga tuzoq qo‘ydilar, Meni tutib olib o‘ldirmoq uchun Sababsiz menga chuqur qazidilar.

⁸To‘satdan ularning boshiga halokat kelsin, Qo‘ygan tuzog‘iga o‘zlari o‘ralib qolsin, Qazigan chuqurga o‘zlari yiqilib, bitsin.

⁹Shunda, ey Egam, Sen tufayli shod bo‘laman, Najot berganing uchun quvonaman.

¹⁰Butun vujudim xitob qiladi: “Senga o‘xshashi yo‘q, ey Egam, Bechorani zo‘ravondan qutqarasan, Faqirni talonchidan qutqarasan.”

¹¹Yovuz niyatli guvohlar paydo bo‘ladi, Bilmaydigan narsalarimni mendan so‘raydi.

¹²Ular yaxshiligimga yomonlik qaytaradi, O‘zimni tamom yolg‘iz his qilaman.

¹³Ular xasta bo‘lganlarida esa Men qanor kiyib, ro‘za tutib, qayg‘u chekardim [1]. Boshimni quyi solib, ibodat qilardim [2].

¹⁴Do‘stim, birodarim, deya tashvish tortardim, Onam uchun aza tutgan kabi yurardim, Qayg‘udan boshimni egib yurardim.

¹⁵Qoqilganimda esa ular shod bo‘ldilar, Menga qarshi yig‘ilishib keldilar, Bexabar ekanman, ular kallakesar ekan, To‘xtovsiz menga bo‘hton qildilar.

¹⁶Shakkoklarday ayovsiz masxara qildilar, Menga qarab tishlarini g‘ijirlatdilar.

¹⁷Ey Egam, qachongacha qarab turasan? Qutqargin meni ularning hujumidan, Xalos qilgin jonimni o‘sha sherlardan!

¹⁸Buyuk jamoa ichra Senga shukr aytaman, Xalq yig‘inlarida Senga hamdlar o‘qiyman.

¹⁹Xoin dushmanlarim ustimdan kulmasinlar, Mendan sababsiz nafrat etganlar Ko‘zlarini o‘ynatmasinlar.

²⁰Tinchlik so‘zini og‘izga olmas ular, Ammo yurtda tinch yashayotganlar ustidan Yolg‘on so‘zlarni o‘ylab toparlar.

²¹Menga qarshi shang‘illab aytarlar ular: “Ah–a, ko‘zlarimiz bilan ko‘rdik qilmishlarini.”

²²O‘zing ko‘rgansan, ey Egam, sukut saqlama! Ey Rabbiy, mendan hech uzoqlashma!

²³Qani, bo‘l, himoya qilgin meni, Men uchun jang qilgin, ey Xudoyim, Rabbim!

²⁴Sen odilsan, ey Egam Xudo, Shu bois meni oqlagin. Dushmanlarim aslo ustimdan kulmasin.

²⁵Ular o‘zlariga o‘zlari: “Ah–a, istaganimiz bo‘ldi–ku!” deb aytmasin. “Uni yutib yubordik–ku”, demasin.

²⁶Kulfatlarimdan zavqlanganlarning hammasi Sharmandayu sharmisor bo‘lsin. Mendan o‘zlarini yuqori qo‘yganlar Sharmandalik, badnomlikka o‘ralsin.

²⁷Men haq bo‘lib chiqishimni istaganlar Xursand bo‘lsin, sevinch ila kuylasin. Har doim aytaversin ular: “Qulining saodatidan huzurlangan Egamiz tobora yuksalaversin.”

²⁸Odilliging haqidagi so‘zlaru madhing Kun bo‘yi tilimdan tushmaydi.