Read O‘zbek tilidagi Muqaddas Kitob, 2013 Zabur 36 Bible Online

Zabur 36 - O‘zbek tilidagi Muqaddas Kitob, 2013 bible

Zabur 36

¹Dovud sanosi. [1] [1]Fosiqlarga g‘ayirlik qilmagin, Badkirdorlarga hasad qilmagin.

²Ular maysaday tezda qurib qoladi, Yam–yashil o‘tday tezda so‘lib qoladi.

³Egamizga umid bog‘lab, yaxshilik qilgin, Shu yurtda yashab, halovat topgin.

⁴Egamizni o‘zingning shodliging deb bil, Ko‘nglingdagi orzularingga U yetkazadi.

⁵Yo‘llaringni topshirgin Egamizga, Ishon Unga, U madad beradi.

⁶Solihligingni U tong kabi porlatadi, Haqligingni kunduzgi quyosh kabi qiladi.

⁷Sabrli bo‘l, muntazir bo‘l Egamizga, G‘ayirlik qilmagin yo‘llarini topganlarga, Fosiq niyatlarin amalga oshirganlarga.

⁸G‘azabdan o‘zingni tiy, qahrdan qaytgin, Ich–etingni yema, bu faqatgina zararga olib boradi.

⁹Yovuzlar yo‘q qilib tashlanadi, Egamizdan umidvorlar yurtga egalik qiladi.

¹⁰Tez orada fosiqlarning kuni bitadi, Sen har qancha qidirmagin, Ularni bu yerdan topa olmaysan.

¹¹Beozorlar esa yurtga egalik qiladi, Mo‘l baxt–saodatdan bahramand bo‘ladi.

¹²Fosiq solihlarga qarshi fitna qiladi, Ularga qarshi tishlarini g‘ijirlatadi.

¹³Rabbiy fosiqlarni masxara qiladi, Ularning kuni bitayotir, buni Rabbiy biladi.

¹⁴Fosiq qilichini sug‘urib, kamonini bog‘laydi, Bechora, mazlumni yiqitishga shaylanadi, To‘g‘ri odamlarni o‘ldirmoq istaydi.

¹⁵Ammo qilichlari o‘zlarining boshini yeydi, Kamonlari ham parcha–parcha bo‘lib ketadi.

¹⁶Solihning qo‘lidagi oz narsa afzal, Jamiki fosiqning boyligidan ko‘ra.

¹⁷Fosiqning kuchi qirqilib ketadi, Solihni esa Egamiz qo‘llab–quvvatlaydi.

¹⁸Aybsizlarning ehtiyoji Egamiz e’tiborida, Ularning mulki to abad davom etadi.

¹⁹Qaro kunlarda ham ular zavol topmaydi, Qahatchilik kunlarda ham farovon yashaydi.

²⁰Fosiqlar esa albatta halok bo‘ladi, Egamiz g‘animlari qirdagi gullarday quriydi, Ular tutun kabi tarqalib, yo‘q bo‘lib ketadi.

²¹Fosiq qarz oladi–yu, qaytarib bermaydi, Solih esa himmat ila in’om qiladi.

²²Egamiz baraka bergan insonlar yurtni egallaydi, Egamiz la’natlagan odamlar esa yo‘q bo‘lib ketadi.

²³Egamiz insonning yo‘lidan mamnun bo‘lsa, Uning qadamlarini sobit qiladi.

²⁴Hatto qoqilsa ham yiqilib tushmaydi, Egamiz madad berib, qo‘lidan ushlaydi.

²⁵Men ham yosh edim, endi keksaydim, Solihlarning tark etilganini, Ularning zurriyoti non tilaganini ko‘rmadim.

²⁶Ular doim himmat ila qarz beradi, Farzandlari ham baraka topadi.

²⁷Fosiqlikni tashla, yaxshilik qilgin, Toki yurtda to abad maskan qilgin.

²⁸Zotan, Egamiz yaxshi ko‘radi adolatni, Tark etmaydi taqvodorlarni, Ularni to abad himoya qiladi, Fosiqlar naslini qirib tashlaydi.

²⁹Solih yurtga egalik qiladi, Bu yurtda to abad istiqomat qiladi.

³⁰Solihning og‘zi donolikdan so‘zlaydi, Uning tili adolatni so‘ylaydi.

³¹Yuragida Xudosining qonuni joy olgan, Shuning uchun qadamida adashmaydi.

³²Fosiq solihni doim kuzatadi, Uni o‘ldirmoqni mo‘ljallab yuradi.

³³Egamiz solihni fosiqning ixtiyoriga topshirmaydi, Hukmga olib kelinganda, solih mahkum bo‘lmaydi.

³⁴Egamizdan umid qil, Uning yo‘llarini tutgin, U seni yuksaltiradi, bu yurtni egallaysan, Fosiqning qirilib ketishini sen ko‘rasan.

³⁵Ko‘rganman fosiq, zolim odamning O‘z yurtida yam–yashil daraxtday unganini.

³⁶Ko‘p o‘tmay u o‘tib ketdi, yo‘q bo‘ldi, Qancha qidirsam ham, topa olmadim.

³⁷Aybsizga e’tibor ber, sofdilni kuzat, Tinchlikparvarning istiqboli yorqin.

³⁸Gunohkorlarning hammasi qirilib bitadi, Fosiqning kelajagi barham topadi.

³⁹Solih kishi Egamiz tufayli najot topgaydir, Kulfat chog‘i Egamiz solihning qal’asidir.

⁴⁰Egamizdan panoh topgani uchun Solihga Egamiz madad beradi, uni qutqaradi, Fosiqdan omon saqlaydi, unga najot beradi.