Read O‘zbek tilidagi Muqaddas Kitob, 2013 Zabur 37 Bible Online

Zabur 37 - O‘zbek tilidagi Muqaddas Kitob, 2013 bible

Zabur 37

¹Dovud sanosi. Bizni Egamizning yodiga solish uchun aytilgan.

²Ey Egam! G‘azab bilan menga tanbeh bermagin, Qahring sochib, menga jazo bermagin.

³O‘qlaring ichlarimni teshib o‘tdi, Qo‘llaring ustimga bosib tushdi.

⁴Butun tanam xastadir g‘azabingdan, Sog‘ligim yo‘qolgan gunohlarim dastidan.

⁵Ayblarim meni juda ham ezadi, Ular juda og‘ir yukka o‘xshaydi.

⁶Aqlsizligim [1] dastidan Yaralarim sasib, yiringlab oqyapti.

⁷Juda egilib, bukchayib qoldim, Kun bo‘yi g‘amgin yuraman.

⁸Ichim isitmadan otash bo‘lib yonmoqda, Tanamda bironta sog‘ joy yo‘q.

⁹Sillam qurib, tamom ezildim, Yurakdagi alamdan nola qilaman.

¹⁰Yuragim tubidagi istaklarim Ey Rabbiy, O‘zingga ravshan, Ohu nolam Sendan yashirin emas.

¹¹Yuragim titraydi, quvvatim ketdi, Ko‘zlarimning nuri adoyi tamom bo‘ldi.

¹²Do‘st–yoronlarim dardim tufayli oldimdan qochadi, Tug‘ishganlarim aslo yonimga kelmaydi.

¹³Jonimga qasd qilganlar menga tuzoq qo‘yadi, Menga zarar istaganlar kulfatdan so‘z ochadi, Kun bo‘yi yolg‘on so‘ylab, fitna qiladi.

¹⁴Men esa karga o‘xshayman, eshitmayman, Soqovga o‘xshayman, gapira olmayman.

¹⁵Chindan ham men soqovga o‘xshayman, Tili qotib qolgan odamdayman.

¹⁶Ey Egam, Umidim yolg‘iz Sensan, Ey Egam Xudo, javob beradigan Sensan.

¹⁷Ey Egam: “Holimni ko‘rib, dushmanlarim shodlanmasin, Oyoqlarim qoqilganda, o‘zlarini katta tutmasin”, deya Senga ibodat qildim.

¹⁸O‘zim ham yiqilay, deb turibman, Muttasil azob chekayotirman.

¹⁹Qilgan egriliklarim uchun tavba qilaman, Gunohlarim uchun tashvish tortaman.

²⁰Ashaddiy dushmanlarim ko‘pdir, Sababsiz mendan nafrat etuvchilar son–sanoqsiz.

²¹Ular yaxshiligimga yomonlik ila javob beradi, Ezgulik ishlarim uchun meni ig‘vo qiladi.

²²Ey Egam, meni aslo tark etmagin, Ey Xudoyim, mendan uzoq ketmagin.

²³Menga yordam bergani shoshilgin, Ey mening najotkorim — Rabbiy!