Read O‘zbek tilidagi Muqaddas Kitob, 2013 Zabur 38 Bible Online

Zabur 38 - O‘zbek tilidagi Muqaddas Kitob, 2013 bible

Zabur 38

¹Ijrochilar rahbari Yodutunga [1]. Dovud sanosi.

²O‘zimga o‘zim shunday deyman: “Yurar yo‘llarimni kuzatib boray, Gunoh so‘zdan tilimni tiyib yuray, Fosiqlar hamon o‘rab turarkan meni, Qulf urib yopib olay og‘zimni.”

³Jim turdim, sukut saqladim, So‘zlashdan bo‘yin tovladim, Oshib boraverdi dardim.

⁴Qizib ketaverdi ichlarim, O‘ylaganim sari o‘rtandi ko‘nglim, Oxiri kalimaga keldi tilim:

⁵“Ey Egam, umrim nihoyasini ayon qilgin, Qancha kunim qolganini ayon qilgin, Umrim qancha qisqaligini bilayin.

⁶Yelday o‘tib ketguvchi umr bergansan, Sening nazaringda umrim bir lahzadir, Har kimning umri bir nafaslikdir.

⁷Har kimning umri soyaday o‘tib ketar, Insonning harakati behuda bo‘lar, Boylik yig‘ar, lekin bilmas Kim boylikka egalik qilar.

⁸Kimdan men umid qilay endi, ey Rabbiy? Sendadir mening barcha umidim.

⁹Xalos qilgin meni gunohlarimdan, Kulmasin ahmoqlar mening ustimdan.

¹⁰Sukut saqlayman, og‘zimni ochmayman, Axir, Sen O‘zing meni shu ahvolga solding.

¹¹Mendan ofatlaringni uzoq qilgin, Sening zarbalaringdan o‘lay, dedim.

¹²Gunohlari uchun insonni jazolab, Unga tanbeh berasan. Kuya yeganday aziz narsalarini yo‘q qilasan. Shubhasiz, inson bir nafasda o‘tib ketadi.

¹³Ey Egam, ibodatimni eshitgin, Nolayu faryodimga quloq solgin. Ko‘z yoshlarimga befarq bo‘lmagin. Axir, men Sening o‘tkinchi mehmoningman, Otalarim kabi musofirman.

¹⁴Qahrli nigohingni mendan o‘girgin, Toki yana xursand bo‘layin Bu olamdan o‘tib yo‘q bo‘lmasimdan oldin.”