Read O‘zbek tilidagi Muqaddas Kitob, 2013 Zabur 39 Bible Online

Zabur 39 - O‘zbek tilidagi Muqaddas Kitob, 2013 bible

Zabur 39

¹Ijrochilar rahbariga. Dovud sanosi.

²Men Egamizga umid bog‘ladim, U menga yuz burdi, faryodimni eshitdi.

³Meni balchiq chuqurdan, Botqoqlikdan chiqarib oldi. Eson–omon meni qattiq yerga o‘tqazdi, Qadamlarimni dadil qildi.

⁴U og‘zimga yangi bir qo‘shiq soldi, Bu qo‘shiq Xudoyimizga madhiyadir. Ko‘plar Uning ishlarini ko‘rib, qo‘rqadi, Va Egamizga umid bog‘laydi.

⁵Baxtlidir Egamizga umid bog‘laganlar, Kiborlarga suyanmaganlar, Butparastlardan yordam kutmaganlar.

⁶Ko‘p mo‘jizalar ko‘rsatding, ey Egam Xudo, Bizga qaratilgan ko‘p niyatlaringni bajarding. Biror zot Senga teng kela olmas, Og‘iz ochib, mo‘jizalaring haqida aytsam, Naqadar ko‘pligini sanay olmasdim.

⁷Sen qurbonligu nazrni istamading, Kuydiriladigan qurbonligu gunoh nazrini talab qilmading, Itoat qilishim uchun Sen quloqlarimni ochding [1].

⁸O‘shanda dedimki: “Mana, men keldim. Muqaddas Bitiklarda men haqimda yozilgan [2].

⁹Sening xohishingni ado etishdan zavq olaman, Ey Xudoyim, Sening qonuning yuragim to‘ridadir.”

¹⁰Ulug‘ jamoang ichra Najoting xushxabarini e’lon qilganman. Ha, ey Egam, O‘zing bilasan, Og‘zimga bir nafas ham dam bermaganman.

¹¹Qutqarganingni yuragimda yashirmadim, Sodiqliging, najotingdan har kimga so‘yladim, Sevging, sadoqatingni buyuk jamoangdan sir tutmadim.

¹²Ey Egam, mendan shafqatingni darig‘ tutmagin, Sening sevging, sadoqating meni to abad saqlasin.

¹³Behisob ofatlar atrofimni o‘radi, Gunohlarim o‘zimning boshimga yetdi, Endi ko‘zlarim ko‘ra olmas, Gunohlarim boshimdagi sochimdan ko‘pdir, Endi jasoratim tamoman so‘ndi.

¹⁴Ey Egam, iltimos, menga najot ber, Kelgin tezda, ey Egam, menga madad ber.

¹⁵Jonimga qasd qilganlar Sharmandayu sharmisor bo‘lsin! Halokatimni istaganlar Uyatga qolib, orqaga qaytsin!

¹⁶“Holing qalay endi?!” deb meni masxaralaganlar Sharmanda bo‘lganidan vahimaga tushsin.

¹⁷Senga yuz burganlarning hammasi Sen tufayli sevinch, shodlikka to‘lsin. Sening najotingni sevganlar: “Egamiz buyukdir”, deb doimo aytsin.

¹⁸Men esa g‘arib, bechoraman, Ey Rabbiy, men haqimda o‘ylagin, Madadkorim, najotkorim O‘zingsan, Kechikmagin, ey Xudoyim!