Read O‘zbek tilidagi Muqaddas Kitob, 2013 Zabur 40 Bible Online

Zabur 40 - O‘zbek tilidagi Muqaddas Kitob, 2013 bible

Zabur 40

¹Ijrochilar rahbariga. Dovud sanosi.

²Baxtlidir bechorani o‘ylaydiganlar, Kulfatda qolganlarida Egamiz ularni qutqaradi.

³Egamiz ularni himoya qiladi, hayotini asraydi, Ular yurtdagi baxtlilardan hisoblanadi, Egamiz ularni dushmanlari ixtiyoriga topshirmaydi.

⁴To‘shakka mixlanib qolsa, Egamiz parvarish qiladi, Xastaligiga Egamiz shifo beradi.

⁵Shunday iltijo qildim Senga: “Ey Egam, shafqat qil menga, Gunoh qildim Senga, shifo bergin.”

⁶Dushmanlarim yovuz niyat ila shunday deydi: “Qachon o‘lar ekan u, nomi ham qachon o‘charkan?”

⁷Ular meni ko‘rgani kelganda, Yolg‘on–yashiq gaplarni gapiradi. Yuraklarida esa fisqu fasod tugib, Tashqariga chiqadi–da, Hamma joyda yoyib yuradi.

⁸Mendan nafratlanganlarning hammasi Menga zarar berishni reja qilishadi, Birlashib men haqimda pichir–pichir qilishadi:

⁹“Og‘ir xastalikka chalingan u, To‘shagidan qaytib tura olmaydi.”

¹⁰Hatto nonimni yegan yaqin, ishongan do‘stim, Menga qarshi bosh ko‘targan.

¹¹Sen esa, ey Egam, menga rahm qil, Meni oyoqqa turg‘az. Qilmishlariga yarasha dushmanlarimga qaytaray.

¹²Dushmanlarim ustimdan g‘olib kelmasa, Mendan mamnun bo‘lganingni bilaman.

¹³To‘g‘riligim uchun meni saqlaysan, Huzuringda to abad meni o‘tqazasan.

¹⁴Olqishlar bo‘lsin abadulabad Isroil xalqining Xudosi — Egamizga! Omin! Omin!