Read O‘zbek tilidagi Muqaddas Kitob, 2013 Zabur 41 Bible Online

Zabur 41 - O‘zbek tilidagi Muqaddas Kitob, 2013 bible

Zabur 41

¹Ijrochilar rahbariga. Ko‘rax naslining [1] qasidasi.

²Kiyik harsillab talpinganday suv irmoqlariga, Ey Xudo, jonim ham Senga talpinadi!

³Jonim tashna Xudoga, barhayot Xudoga, Qachon borib, Uning huzurida hozir bo‘laman?

⁴Ozig‘imdir kechayu kunduz ko‘z yoshlarim, “Qani Xudoying?” deya masxara qilar odamlar doim.

⁵Shodlik hayqiriqlariyu hamdu sanolar ostida Jamoa bilan birga Xudoning uyiga borardim. Bayram nishonlagani olomon bilan borardim. Shularni eslab, yuragim pora–pora bo‘lmoqda.

⁶Nega tushkunlikka tushasan, ey jonim? Nega behalovat bo‘lasan ichimda? Xudoga umid bog‘la! Shukr etaman Yana Unga — najotkorim,

⁷Xudoyimga. Tushkunlikka tushib ketganman. Shu bois, ey Xudo, Seni Iordan diyoridan, Xermon [2] tizmasidan, Mizor tog‘idan [3] turib eslayman.

⁸O‘kirayotgan dengizlarday, Guvullayotgan sharsharalarday Sen yuborgan qayg‘u to‘lqinlari O‘tgandilar ustimdan bosib.

⁹Kunduzi Egam sodiq sevgisini ko‘rsatadi, Tunlari U menga qo‘shiq beradi, Menga umr bergan Xudoga ibodat qilaman.

¹⁰Xudoga, suyangan Qoyamga aytaman: “Nega meni unutib qo‘yding Sen?! Ne uchun g‘amga botib yurmog‘im kerak Dushmanlarim siquvi sababidan?!”

¹¹Dushmanlarim haqoratidan suyaklarim zirqiraydi, Ular muttasil mendan: “Qani Xudoying?!” deya so‘raydi.

¹²Nega tushkunlikka tushasan, ey jonim? Nega behalovat bo‘lasan ichimda? Xudoga umid bog‘la! Shukr etaman Yana Unga — najotkorim, Xudoyimga.