Read O‘zbek tilidagi Muqaddas Kitob, 2013 Zabur 43 Bible Online

Zabur 43 - O‘zbek tilidagi Muqaddas Kitob, 2013 bible

Zabur 43

¹Ijrochilar rahbariga. Ko‘rax naslining [1] qasidasi.

²Ey Xudo, o‘z quloqlarimiz ila eshitganmiz. Qadim zamonda, ha, ota–bobolarimiz davrida Qilgan ishlaringni ular bizga aytgan edi.

³O‘z qo‘ling ila quvding begona xalqlarni, Ularning yurtiga o‘tqazding otalarimizni, Kulfatga solding begona xalqlarni, Ozod qilding Sen otalarimizni [2].

⁴Ular yurtni qilich ila olmadilar, O‘z qo‘llari ila g‘alabaga erishmadilar. Ular Sening o‘ng qo‘ling, qudrating, Sening yuz nuring ila g‘olib bo‘ldilar. Zero, Sen ulardan mamnun bo‘lganding.

⁵Sen Shohimsan, Xudoyimsan, Amr ber, Yoqub nasli g‘olib bo‘lsin.

⁶Sen tufayli dushmanimizni surarmiz, Noming ila g‘animlarimizni ezg‘ilarmiz.

⁷Ishonib qolmasman men o‘z yoyimga, Qilichim g‘alaba keltirmas menga.

⁸G‘animlarimiz ustidan bizni g‘olib qilding, Bizdan nafratlanganlarni sharmanda qilding.

⁹Ey Xudo, kun bo‘yi Sen tufayli maqtandik, To abad Senga shukronalar aytamiz.

¹⁰Endi esa bizni rad qilib, sharmanda qilding, Lashkarlarimizni boshlab bormayapsan.

¹¹Bizni dushmanlarimiz oldiga chekintirding, G‘animlarimiz bizni talon–taroj qildi.

¹²Bizni qo‘ylar kabi yemishga berding, Xalqlar orasiga bizni yoyib yubording.

¹³Xalqingni qora chaqaga sotib yubording, Ularni sotishdan hech naf ko‘rmading.

¹⁴Qo‘shni xalqlari bizni masxara qiladi, Sen yo‘l qo‘yib berding. Atrofimizdagilar bizni tahqirlaydi, Kulishlariga imkon berding.

¹⁵Xalqlar orasida kulgi qilding bizni, Xalqlar bizni masxaralab, chayqaydi boshini.

¹⁶Har doim xijolat bo‘lib yuraman, Sharmandalik yuzimni qoplagan.

¹⁷Eshitganimiz masxarayu haqorat! Ko‘rganimiz qasoskor dushman!

¹⁸Garchi Seni unutmagan bo‘lsak–da, Garchi ahdingga xiyonat qilmasak–da, Bu ko‘rgiliklar boshimizga tushdi.

¹⁹Biz Seni hech qachon tark etmadik, Sening yo‘llaringdan hech qachon toymadik.

²⁰Ammo chiyabo‘rilar makoniga bizni tashlading, Zim–ziyo zulmatga bizni uloqtirding.

²¹Ey Xudoyimiz, axir, Sening nomingni unutsak, Qo‘llarimizni begona xudolarga ochsak,

²²Ey Xudo, Sen buni bilmasmiding?! Axir, Sen yurakdagi sirlarni bilasan–ku!

²³Sen tufayli har kun o‘limga duch kelamiz, Bo‘g‘izlanadigan qo‘yday bo‘lib qolganmiz.

²⁴Tursang–chi, nega uxlayotgandaysan, ey Rabbiy?! Qani, bo‘l, bizni to abad rad etmagin.

²⁵Nega bizdan yuzingni yashirasan?! Boshimizga tushgan kulfatu zulmni unutasan?!

²⁶Biz ag‘natilganmiz tuproqqa, Tanamiz yopishib qolgandir yerga.

²⁷Qani, kel, bizga madad ber, Sodiq sevging haqi bizni qutqar.