Read O‘zbek tilidagi Muqaddas Kitob, 2013 Zabur 44 Bible Online

Zabur 44 - O‘zbek tilidagi Muqaddas Kitob, 2013 bible

Zabur 44

¹Ijrochilar rahbariga. “Nilufar” kuyiga aytilgan. Ko‘rax naslining [1] qasidasi. To‘y qo‘shig‘i.

²Shohimga she’rlarimni bag‘ishlayman, Yuragimdan go‘zal so‘zlar to‘kiladi, Tilim mohir kotib qalamiga o‘xshaydi.

³Ey shohim! Insonlar orasida juda chiroylisan. Xudo senga to abad baraka bergani uchun Lablaringdan latif so‘zlar yog‘iladi.

⁴Ey qudratli shoh, belingga bog‘la qilichingni, Hashamatu ulug‘vorliging bilan zohir bo‘lgin.

⁵Ulug‘vorlik bilan olg‘a bos! Haqiqat, kamtarlik, adolat uchun g‘alaba qil! O‘ng qo‘ling qo‘rqinchli ishlar ko‘rsatsin.

⁶G‘animlaringning yuragini O‘tkir o‘qlaring teshib o‘tadi. Xalqlar oyog‘ing ostiga yiqiladi.

⁷Xudo bergan taxting [2] abadiydir, Adolat hassasi shohliging hassasidir.

⁸Sen solihlikni sevasan, qabihlikdan nafrat etasan. Shu bois Xudo seni do‘stlaringdan ustun qildi, Ha, Xudoying shodlik moyini senga surtdi.

⁹Libosingdan mirra, sabur, dolchinning Xushbo‘y hidlari ufurar. Fil suyagi bilan bezatilgan saroylarda Cholg‘u navolari seni shod qilar.

¹⁰Shoh qizlari izzatli xonimlaring orasidadir, Ofir [3] oltiniga bezangan malika o‘ng qo‘lingda o‘tirar.

¹¹Tingla, ey qiz, quloq solib, o‘ylagin, Xalqing, otang xonadonin unutgin.

¹²Jamolingga shoh maftun bo‘lgandir, Ta’zim qil unga, u xo‘jayiningdir.

¹³Tir [4] xalqi hadyalar olib keladi, Boylar sendan marhamat istaydi.

¹⁴Saroyda malika naqadar go‘zal! Liboslari oltin bilan bezatilgan.

¹⁵Naqshli libosida uni shoh huzuriga olib kelishadi, Ortidan qizlar, uning dugonalari ergashib keladi.

¹⁶Ular shod–xurramlik ichra keladi, Shohning saroyiga ular kirib keladi.

¹⁷Ey shohim, o‘g‘illaring olgaylar otalaring o‘rnini, Butun yurtda shahzodalar qilgaysan sen ularni.

¹⁸Qo‘shig‘im tufayli noming nasllar osha yashar, Shu bois xalqlar seni to abad madh etarlar.