Read O‘zbek tilidagi Muqaddas Kitob, 2013 Zabur 48 Bible Online

Zabur 48 - O‘zbek tilidagi Muqaddas Kitob, 2013 bible

Zabur 48

¹Ijrochilar rahbariga. Ko‘rax naslining [1] sanosi.

²Eshitinglar, ey xalqlar, Quloq soling, olam ahli,

³Ey insonlar, jamiki odamzod, Boylaru faqirlar, quloq solingiz!

⁴Og‘zimdan to‘kiladi dono so‘zlar, Qalbimning mushohadasi ham idroklidir.

⁵Qulog‘imni hikmatga buraman, Ma’nosini lira bilan anglataman.

⁶Nega qo‘rqishim kerak qaro kunlarda?! Nega qo‘rqishim kerak ta’qib qiluvchilar Qabih ishlari bilan meni o‘rab olganlarida?!

⁷Ular mol–mulkiga ishonadilar, Behisob boyliklari ila maqtanadilar.

⁸Axir, hech kim hayotini [2] pul to‘lab qutqara olmas, Yoki uning uchun Xudoga to‘lov berolmas.

⁹Inson hayoti uchun to‘lov g‘oyat qimmatdir, Hech qanday to‘lov yetarli bo‘lmas.

¹⁰Yo‘qsa inson to abad yashardi, Qabr yuzini aslo ko‘rmasdi.

¹¹Dononi qarang, ular ham o‘ladi, Ahmoq, bema’ni birday halok bo‘ladi, Ularning boyligi boshqaga qoladi.

¹²Yurtlarga o‘zlarining nomini berganda ham, Mozor to abad uyi bo‘lib qoladi, Maskani nasldan–naslga o‘taveradi [3].

¹³Boyligiga qaramay inson to abad qolmas, O‘ladigan jonzotga o‘xshaydi ular.

¹⁴O‘zlariga ishonganlarning qismati shudir, Ularning so‘zini ma’qullaganlarning taqdiri shudir:

¹⁵Qo‘ylar kabi o‘liklar diyoriga haydaladilar, O‘lim ularning cho‘poni bo‘ladi, Tongda to‘g‘ri insonlar ularning ustidan hukmron bo‘ladi, Tanalari chirib ketadi, O‘liklar diyori [4] ularning qasri bo‘ladi.

¹⁶O‘liklar diyori hukmidan Xudo meni qutqaradi, Shubhasiz, U meni O‘z yoniga oladi.

¹⁷Birontasi boyib ketganda, Uyining hashamati oshib ketganda, Vahimaga tushma!

¹⁸Olamdan o‘tganda, u o‘zi bilan hech narsa olib ketmaydi, Boyligi ham uning ortidan qabrga ergashib bormaydi.

¹⁹Hayotligida o‘zini baxtiyor hisoblaydi, Oshib–toshib yashagani uchun Ko‘plar unga hamdu sano aytadi.

²⁰U ham ota–bobolari yoniga ketadi, Ular kabi yorug‘likni boshqa ko‘rmaydi.

²¹Boyligi bo‘la turib aqlsiz bo‘lganlar O‘ladigan jonzotga o‘xshaydilar.